مرحبا انيقاتي
♥ ♥
كلنا نهتم بالمظهر الخارجي ونشتري اغلى المنتجات عشان تبين بشرتنا باجمل شكل وملمس
لكن احيانا نحس ان مهما سوينا ومهما اعتنينا وتعنينا مافي فايدة والمشكلة ما تنحل
ف يتسلل لنا اليأس ونجزم ان البشرة البيرفكت حلم صعب المنال
وما نسأل انفسنا ليه المشكلة ما تنحل ؟؟ ليه مافي حل جذري يقشع كل مشاكل بشرتنا ؟طفشنا ترا !!
مشاكل العصر هذا من تزايد لتزايد ,خصوصا مشاكل الصحة اللي تنعكس تدريجيا على بشرتنا.
كثير احيان نحس بصداع وملل وعصبية وارهاق ونشوف ناس بس ودها تتهاوش مع ذبان انفها.
والغريب العجيب انك تشوفين شباب في عمر الزهور يشتكون من فقدان الطاقة
غير الامراض اللي ماخلت احد الا ولطمته لطمة
كل هذي المشاكل اللي نواجهها سببها تعرض اجسامنا لكميات هائلة من المواد الكيميائية سواء عن طريق الهوا اللي نستنشقه او الاكل اللي ناكله.
كلنا نعرف ان عوادم السيارات تحمل ملوثات لا حصر لها , غير الاكل اللي صاير ينضاف له مواد تحافظ عليه وتحلي لونه وماتخليه يفسد بسرعة.
طبعا هذي المواد مالها ضرر مباشر لكن تراكمها على مر السنين تسبب مشاكل ماتنعد على الاصابع للاسف.
لذلك جسمنا المسكين ذبل من خليط الكيماويات وبقايا المعادن الثقيلة اللي تسري بدمنا, من البديهي ان جسمنا اساسا مكفل بطرد السموم عن طريق الكلية , الكبد , العرق او حتى الجهاز التنفسي لكن جسمنا دخل في حالة صدمة عنيفة من كمية السموم اللي فيه لدرجة انه مهو عارف وش يطرد و وش يخلي , بعد تعرضه لكميات فوق طاقته ماعاد فيه يتحملها.
طيب وش يعني ما ناكل ولا نتنفس !!؟؟
طبعا لا مو لهذي الدرجة عاد , الموضوع اسهل من كذا مجرد اننا نساعد جسمنا في التخلص من السموم هذي وننقيه بنظام الـ Detox او نظام التخلص من السموم.
وش هو الـ Detox !
هي عملية لتطهير الجسم من السموم المتراكمة اللي ممكن تعيق اجهزة الجسم او تتعبها زي ما يعرف بالـ Detoxifation سواء بطرق طبيعية او بالادوية , هذي السموم ممكن تنتج من الاغذية او زي ماقلت سموم خارجية.
مدة الديتوكس تختلف من شخص لاخر ومن نظام لاخر بعضها تمتد لفترة اسبوع زي نظام 7 days Detox او لمدة يوم زي النظام اللي اعتمده.
بتخلصنا من السموم المتراكمة بجسمنا راح تشتغل اجهزة جسمنا بكفائة اعلى زي مانعرف ان الجهاز اللمفاوي مكلف انه ينظف الخلايا والكلية تنقي الدم والجسم يخرج سمومه من خلال العرق.
علاوة على ذلك راح يرجع جسمنا لحالة التوازن الطبيعية وبكذا هذا النظام راح يعالج مشاكل الجهاز الهضمي والجهاز العصبي والمناعي ولا ننسى ان جسمنا يحتاج لتنظيف دوري من السموم يعني لازم نستمر ونعتمد هذا النظام ك اسلوب حياة.
الديتوكس موب بس للجسم لا المفروض يكون شامل للروح والعقل والذهن , كلنا نعرف ان كل ما صارت صحة ارواحنا وعقولنا تمام التمام تحسنت صحة اجسامنا وماراح نحقق الصفاء الذهني والروحي الا بالروقان والرياضة وتمارين الاسترخاء والتنفس العميق.
تاريخ الـ Detox.
اهتم الطب الصيني التقليدي منذ قدم العصور بتنقية الجسم من السموم مع ان وقتهم ماكان في الكيماويات اللي موجودة بعصرنا الحالي (ضريبة التحضر والمدنية) لكن فوق ذا كانو يسعون لطرد السموم من اجسامهم ظنا منهم ان طرد السموم من الجسم يطول باعمارهم ويبعد عنهم الامراض غير كذا يصفي ذهنهم.
نفس الشي بالنسبة للطب الهندي القديم Ayurvedic اعتمدو على الاعشاب والحمامات البخارية والتدليك بالزيوت العطرية لطرد السموم من الجسم واليوغا لطرد السموم من العقل والروح كما يزعمون!
طيب كيف اعرف اذا احتاج لذا النظام او لا !!
اذا كنتي تعانين من التالي :
- ارهاق مستمر
- عصبية طول الوقت
- مشاكل بالهضم وانتفاخات
- رائحة عرق وفم كريهة
- القولون
- صداع مستمر
- عدم تركيز
- صعوبة تنفس بدون سبب عضوي
- كثرة تعرضك للزكام والامراض
- حبوب الشباب والهالات السوداء ومشاكل البشرة عامة
- الاكزيما
والقائمة تطول , على اية حال حتى لو ماكنتي تعانين من المشاكل اعلاه وهذا شبه مستحيل فبأي حال جسمك محتاج للتنظيف في كل الاحوال يعني مالك مفر.
هذا اختبار بسيط ارسلته بالتويتر سابقا تقدرين تختبرين بنفسك وتشوفين نسبة احتياجك للنظام ذا
اذا كنتي حامل او تعانين من مشاكل صحية زي الضغط او السكر يحبذ انك ما تعتمدين نظام الديتوكس الطويل لكن نظامي ماراح يضرك ان شاء الله لان فترته قصيرة ولكن يحبذ تستشيرين طبيب قبل البدأ.
بعض البنات يعتقدون ان نظام الديتوكس ما يتبعه الا صاحبات الوزن الزائد عشان يتخلصون من الشحوم خصوصا ان قائمة الحرمان في هذا النظام طويلة نوعا ما , لكن الحقيقة انه يناسب كل الاشخاص لان مهمته في المقام الاول التطهير وهذا مايمنع انك تقدرين تنزلين وزنك من خلاله بس باعتدال لان ممكن ترجعين لنظامك الاقشر سابقا ويرجع وزنك معه.
لذلك اذا اعتمدتيه لانقاص الوزن لازم تحطين ببالك بعض الاعتبارات اللي تخليك تحافظين على الوزن اللي وصلتي له.
جدول نظام الديتوكس ليوم واحد:
- نظام غذائي مايلعب + عصير إكسير الحياة
- جلسة استكنان
- حمام الديتوكس باستخدام الملح الانجليزي
- رياضة + تمارين الاسترخاء والتنفس العميق.
راح اتكلم عن كل نقطة بالتفصيل عشان قبل لا تبدين تتبعين هذا النظام تكون عندك نظرة شاملة , اول شي لازم تختارين يوم من ايام الاسبوع تتفضين كل الفضاوة فيه للديتوكس وحاولي تخلصين كل اشغالك قبل ذا اليوم عشان لا يعيقك شي ويخرب عليك.
يحبذ يكون يوم اجازة اذا عندك دوام واهم شي تجهزين نفسيتك عشان تتقبل كمية الدلال اللي راح تمنحينه جسمك وروحك مو من المعقول انك تدلعين نفسك و نفسيتك
مش ولابد.
.jpg)
.jpg)
