على الهآمش : صناعة الفوتوجونيك خدعة في عصر الإنستغرام EVERYONE IS PHOTOGENIC

مسائكم مكلل بالأوركيد 

♥ ♥

قبل يومين رحت انا واخوي للمدينة القديمة في استوكهولم عشان نشوف تاريخ هذي المدينة الرائعة بكل ما للكلمة من معنى.
 اللي يميز المدينة القديمة طرقاتها الضيقة وشكل المدينة الاثري اللي ما دخل في جو المدن الكبرى
مع انها جزء من العاصمة المكتظة بالسيارات والمصانع والحياة السريعة الى ان هذي البقعة تمتاز بالهدوء والراحة النفسية.
المهم وحنا نتمشى في هذي الطرقات جلسنا نتناقش عن كل المواضيع القابلة للنقاش وابرز هذي المواضيع اختلاف اشكالنا الحقيقية عن اشكالنا بالصور تختلف من هينا
 جت فكرة ذا البوست الخفيف اللي اتمنى بجد يغير مفهوم منتشر بيننا بشكل غريب ومؤثر على ثلاثة ارباع المجتمع.

كثير مننا يشوفون اشكالهم بالمراية ولا احلى انف مرتب عيون حلوة ابتسامة خلابة ملامح ككل رائعة ويا ارض انهدي محدا أدي
 وعشان نوثق هذي اللحظة الجميلة نجيب الكاميرا ونصور الى مالا نهاية لكن لما نشوف الصور...

 هينا الطآمة الانف المرتب كبر العيون صغرت الشكل صار صدمة العمر وقتها نتحطم ونعادي الكاميرا بقية العمر ويصير التصوير كابوس بالنسبة لنا  ونحس اننا انخدعنا من المرايا وسرا الليل وحنا ماسرينا.

 قريت معلومة فسرت هذي الظاهر الغريبة تفسير شفته منطقي , لما نشوف اشكالنا في المرايا بعينين اثنين يختلف تماما عن التقاط صورة بعدسة واحدة لاننا نشوف أشكالنا بأبعاد ثلاثية بعكس الكاميرا اللي تلتقط اشكالنا من زاوية واحدة غير كذا كاريزما الشخص وروحه  اللي تزيد من جماله ماتظهر بالصور عشان كذا نشوف اشكالنا بالمرايا احلى بكثير من الصور.

ايش السبب ي ترى !!

الجواب المتداول لأن الكاميرا ماتحبنا او على البلاطة حنا موب فوتوجونيك.


كل ما سألت وحدة ليه ماتحبين تتصورين تقول لي ابد والله بس وجهي موب فوتوجونيك عشان كذا ما اطلع حلوة بالصور.
ما انكر ان في ناس بالفعل الكاميرا تظلمهم وما تلتقط جمالهم الطبيعي ثم يختلف شكلهم بالصور والعكس صحيح تجيك ناس اشكالهم بالصور اجمل من الواقع لكن هذا ما يعني ان الصنف الاول مايقدر يصير زي الصنف الثاني اللي يعتبر ذكي لاسباب راح تعرفونها من خلال البوست.

الغلط اننا حبسنا انفسنا بمصطلح الفوتوجونيك وصارت الشماعة اللي نعلق عليها كل صورة شينة لنا

لكن قبل كل شي خلونا نتعرف على ذا المصطلح بشكل اعمق او وش هي الفكرة ورا استخدام فوتوجونيك لوصف شخص معين.

بحثت عن كلمة photogenic بالمعجم وعطتني هذي الترجمة الحرفية :

photogenic |ˌfōtəˈjenik| - adjective 

 (esp. of a person) looking attractive in photographs or on film : a photogenic child -

 Biology (of an organism or tissue) producing or emitting light -

بما معناه ان الفوتوجونيك حرفيا هو الشخص اللي تحبه الكاميرا ويطلع شكله جميل بالصور بغض النظر عن الاشياء اللي راح نتطرق لها بعدين.

لكن المعنى الحقيقي اللي الكل يجهله هو ان "الفوتوجونيك" اساسا عبارة عن لحظة او مشهد وليس شكل فقط .

في مشاهد كثيرة اسهل من غيرها بالتصوير يعني اذا عندك اضاءة كويسة وخلفية مناسبة من الممكن انك تخلقين صورة في منتهى الجمال.

"المشهد الفوتوجونيكي" يمكن يكون مظهر طبيعي محدد في وقت معين

من اليوم في فصل معين مع مشهد غيوم مغري مناسب هينا كوننا مشهد فوتوجونكي بحت متناسق كل جزء فيه ساعد ان الصورة تطلع رائعة يعني ما اعتمدنا على الغيوم ونسينا الوقت او اننا ما اعتمدنا على الفصل ونسينا اللي حوله هذي هي الفكرة ببساطة عدة اشياء منسجمة ومتناغمة مع بعض عطتنا صورة جميلة نقدر نسميها "فوتوجونيك"

او لما تصورين شخص عيونه تضيء بالفرح النابع من القلب هذي لحظة فوتوجونيكية يبقى خلق و ايجاد الصورة الفوتوجونيكية مسؤولية المصور ويعتمد على تذوق الشخص لفن التصوير مايعتمد نهائيا على شكل الشخص زي ماهو ببالنا.

لذلك كلمة "فوتوجونيك" مالها اي اساس من الصحة ولا ترتبط بشكل الشخص عشان كذا ما احبذ استخدمها لأننا اذا حبينا نستخدمها عشان نوصف فيها الاشخاص هذا يعني اننا كلنا نعتبر "فوتوجونيك" لانك بكل بساطة تقدرين تخلقين "اللحظة الفوتوجونيكية" لكل شخص على ذا الارض.

تصوير الاشخاص :

من خلال كورس التصوير اللي اخذته ولازلت اخذه اكتشفت ان تصوير الاشخاص او البورتريت من اصعب انواع التصوير

وتحتاج اختيار اضاءة مناسبة علاوة على ذلك لابد يكون في توالف وتناسق في التكوين غير كذا لازم تركزين على سرعة الغالق وفتحة العدسة ونسبة التباين وعمق الميدان وغيره وغيره وغيره لكن ابختصر لك كل ذا بالاضاءة والتكوين ركزي عليهم وراح تلاحظين تغير نوعي ملحوظ بالتصوير الشخصي وبرضو من العوامل اللي تساعد على التقاط صور شخصية جميلة التوقيت , العاطفة والراحة.

الجمال في البشر دايما موجود بعيدا عن عدسة الكاميرا , البشر جميلين لما يستمتعون بالحياة ويكونون لطيفين مع غيرهم او حتى مع انفسهم عشان كذا الناس دائما اجمل بالصور لما يكونون على طبيعتهم مرتاحين ومبسوطين خصوصا لما نلتقط الصورة بالتوقيت الصح , اكيد صعب اننا نلتقط العاطفة الحقيقة بالصور واللي يخلي ذا الشي اصعب انك تكونين مو مرتاحة او متوترة قدام الكاميرا والمشاعر المزيفة دائما تنتج صورة بورتريت سيئة.

لو لاحظنا ان صور الاطفال دائما تكون جميلة لانهم مجرد ما يحسون بعدم ارتياح يعبرون عنه ودايما يكونون عفويين بدون تصنع او تظاهر بعكسنا حنا دايما نخبي عدم ارتياحنا ورا ابتسامة مزيفة او حركات لا تمت للعفوية بصلة حلو نكون على طبيعتنا وما نتظاهر عشان نطلع حلوين بالصور زي ما حنا حلويين بالواقع.

The "unphotogenic" cycle الدورة اللافوتوجونيكية :

تذكري ان الصورة السيئة تنعكس على المصور موب على الشخص اللي تم تصويره لان كثير ناس  من الممكن انهم يتعثرون في حلقة سيئة من الصور السيئة يعني اذا شخص شاف صوره طلعت شينة راح يبدأ ياخذ فكرة سيئة عن شكله ويقل تقديره لذاته وتبدأ فكرة " انا منيب فوتوجونيك " تتكون وتترسخ بعقل الشخص ذا ويصنف نفسه على ذا الاساس بعد كذا يبدأ الشخص ذا يتجنب الكاميرا لانه يتوقع المزيد من الصور الشينة و كنتيجة راح يكون مو مرتاح ابد قدام الكاميرا لخوفه من ان تجربة الصور السيئة تكرر معه ف يدخل بدوامة عدم الراحة اللي تنعكس عليه بالصور , موب لانه اقل جمالا من غيره لا بل لانه اقل راحة من غيره امام الكاميرا.

اننا نكون مرتاحين قدام الكاميرا مهب صعبة ابد بالعكس بس يبي لنا شوية ممارسة لاننا محنا متعودين على الكاميرا والاضواء زي المشاهير اللي يعتبرون اكثر الناس راحة قدام الكاميرا لانهم يضطرون يكونون امام جمهور طول الوقت لذلك الكاميرا بالنسبة لهم شي عادي وروتين متعودين عليه ف نادر نشوف اي احد من المشاهير يطلع شين بالصور دايم باجمل طلاتهم وفوتوجونيك.

صناعة الفوتوجونيك :

 صناعات كبيرة وكثيرة تتمحور حول تعزيز فكرة ان بعض الناس فوتوجونيك اكثر من غيرهم فالفكرة بحد ذاتها تعزز عدم الاستقرار النفسي او تقلل من نظرتك لنفسك بعد كذا يبدون يبيعون لك اشياء في محاولة للتعويض عن النقص اللي اوجدوه فيك او يقنعونك ان اشخاص معينين افضل منك بطريقة او بأخرى.

لذلك لما تشوفين صورة لأحد المشاهير في غلاف مجلة او غيره تأكدي ان الصورة كلفت اموال طائلة عشان تكون بهذا المستوى , المعدات الكثيرة , انواع الكاميرا , الجو والمشهد المحبوك ولا ننسى تأثيرات الفوتوشوب المتكدسة على بعض الصور لها ضلع بالموضوع  لكن كل ذا مايعني ابد ان ذا المشهور فوتوجونيك اكثر منك هي مجرد فكرة نشروها عشان الناس تبدأ تصنف نفسها على ذا الاساس لذلك بعض الشركات الكبيرة حاولت انها توصل لاكبر شريحة من الناس من خلال وسائل الاعلام وايقوناتها ف بدأو يقنعون الناس ان هذي الفئة اجمل مننا وعشان نصير زيهم يجلسون يسوقون منتجاتهم على أفانا.

سر الطلة الجذابة في الصور :

انتي اساسا جميلة !  بس عشان تكونين اجمل بالصور اعتمدي خدع بسيطة تخلي مظهرك اكثر جاذبية وتنتج لك صور حلوة تعجبك وترضيك :

- خلك مسترخية اكثر شي لا تتوترين وتشدين على نفسك. 

- كوني مرتاحة وعلى طبيعتك.

- خلك واثقة من نفسك لان الثقة مفتاح يخليك فوتوجونيك وذا راح ينعكس على كل شخص يشوف صورك.

- ابتسمي بعيونك حتى لو ما ابتسمتي بفمك ولو ان الاجمل تبتسمين بالاثنين ولا تستحين من اسنانك ابد دايم طلعيهم لان الابتسامة تبين حقيقية اكثر ومو مصطنعة اذا بينت اسنانك.

- اعتمدي على الاضاءة الطبيعية وابعدي عن الفلاش. 

- ضبطي زاوية وجهك : زاوية وجهك مرتبطة بإتجاه نظرتك للكاميرا عشان كذا لا تناظرين الكاميرا مباشرة لانها راح تخلي وجهك مليان مسطح وخالي من الظلال الطبيعية عشان كذا خلي وجهك على جنب شوي لخلق الضو والظلال الطبيعية وتحديد شكل وجهك.

- ركزي على الشي اللي يميزك عن غيرك وطنشي عيوبك بدل ما تحاولين تخفينها.

- مكياجك ومظهر بشرتك لهم لمسة خاصة بالصور لا تهملينهم ابد.

- لا تتصورين اذا ماكان لك مزاج , دايما تصوري وانتي مبسوطة ولك مزاج للصور لان نفسيتك راح تنعكس على الصورة.

- تعلمي تحبين نفسك و انبسطي وانتي تتصورين , تحركي و اضحكي , سوي اي حركة لو سخيفة اهم شي لا تتصورين بابتسامة متجمدة اغلب الصور الجميلة هي الصور اللي فيها روح وحياة دايما توصل للقلب.

فكرة انا فوتوجونيك او انا منيب فوتوجنيك منتشرة بشكل واسع بيننا في الفترة الاخيرة مع ثورة مواقع التواصل والانستغرام.

لابد نمحي هذي الفكرة ونبدأ نوقف نصنف انفسنا وغيرنا على كذبة صدقناها وبدينا نحكم على انفسنا وغيرنا من خلالها , لو شفنا العالم حولنا من عدسة عيوننا راح نشوف ان كل الناس جميلة كل الناس فوتوجونيك.

بشوية خدع بسيطة ولعب بالضو والزوايا نخلق لانفسنا صور ولا اجمل ونبطل نهرب من الكاميرا ونكرهها.

المرة الجاية اللي تسمعين فيها وحدة من صاحباتك تقول انها مو فوتوجونيك ذكريها ان فكرة تصنيف الناس على ذا الاساس بحد نفسها ضارة على الشخص وعلى ثقته وعلى نفسيته حطي ببالك بابتسامة صغيرة طالعة من جوا قلبك انتي مبهرة.

إزميل 

♥ ♥