الاثنين، 8 يوليو 2013

تقويم الاسنان: بين النتيجة الأفضل والأسوء خطوة , روتين عناية + شوية نصايح




♥ 




السلام عليكم ورحمة الله 



الاسنان وما ادراك ما الاسنان 
من مننا ما تحلم باسنان بيضا جميلة ومرتبة تزيد من جمال ابتسامتها
طبعا كلنا نتمنى ذا الشي والدليل المبالغ اللي نصرفها في التبيض وغيره 
طيب بدل ما نجلس نعالج الخلل ليه ما نتداركه من الاول
من مبدأ الوقاية خير من العلاج.
كلنا ندري ان نظافة الاسنان شي مهم اولا لصحتنا وثانيا لمظهرنا 
شي مشين اننا نشوف وحدة يقال انها مهتمة بنفسها ومكياج الدنيا بوجهها ولا جت تبتسم 
ننصرع من صفار اسنانها ومظهره اللي لا يمت للاهتمام والشياكة بصلة والاشين مظهر الروج الاحمر على الاسنان الصفرا.
خلونا صريحين في مجتمعنا هذي الفئة منشرة بشكل كبير خصوصا اننا مانهتم بزيارة طبيب الاسنان الا لا سوست السن وخلصت عكس الغرب
اللي يعطون اهمية كبيرة لزيارات طبيب الاسنان حتى انهم من الصغر يعودون اطفالهم على الانتظام والتشييك لازم نغير من ذا الشي ونفهم اهمية العناية بالاسنان اولا
ثم اهمية الزيارة الدورية للطبيب هذا اذا ما ودك كل شوي تنبطحين بعيادة الاسنان بسبب التسوس والمشاكل اللي لها اول ومالها اخر.



اشياء ماتعرفينها عن اسنانك :

- ضرر الحمضيات زيه زي ضرر السكريات لانه وبكل بساطة يسبب تآكل المينا وتقلص حجم الاسنان
- المينا هي اقسى مادة بالجسم لكن من الممكن كسرها بسهولة , الثلج و البوب كورن ممكن يتسببون ب رقاقة الاسنان وبعض دكاترة الاسنان شبهو اكلنا بالبوب كورن بأكل الحجر غير كذا حلق اللسان والشفايف ممكن يضر اسنانك لانها تؤوي البكتيريا وذا بدوره يسبب رقاقة الاسنان.
- كثرة الفلوريدا سيئة لاسنانك خصوصا في مرحلة تشكل الاسنان لانها تسبب بقع بيضا على اسنانك تسمى ب تصبغات الفلور وللاسف ازالتها يعتبر صعب.


ليه الاهتمام بصحة اسنانك مهمة ؟

- وقاية من الامراض : نظرا لان اكثر الامراض يمكن الوقاية منها عن طريق الفم , تنظيفك المنتظم لاسنانك بعد كل وجبة واستخدامك الخيط + زيارتك للطبيب مرتين بالسنة يعتبر روتين وقائي من عدة امراض وبكذا راح تحدين من مشاكل اسنانك قبل تتفاخم وبرضو اعتمادك على ذا الروتين راح يقلل من نسبة اصابتك بالالتهابات اللي ممكن تعرضك لمشاكل صحية زي امراض القلب.

- نفس طيب : النفس الطيب دايم يكون مرتبط بالتنظيف الجيد للاسنان لكن اذا انتي ملتزمة بالتنظيف الجيد ولسى عندك مشاكل و روائح كريهة يمكن تكون مشكلتك مهب باسنانك هينا لازم تفحصين وتشوفين المشكلة وين بالضبط.

- ثقتك بالنفس : الاسنان اللي تنعطا اهتمام ووقت كافي دايم شكلها اجمل خصوصا بالارواج الفاقعة اللي تبرز اذا كانت اسنانك مهملة او معتنى فيها وذا الشي راح يعطيك كمية من الثقة بالنفس وتكثرين ابتسام.

- توفير قروش : معروف ان زيارات طبيب الاسنان مكلفة خصوصا اذا الاسنان مهملة من فترة طويلة بعكس ذلك فرشاة اسنان و معجون و خيط مافيه ارخص منهم.


طيب وش اسوي عشان احافظ على صحة اسناني ؟

هي شوية خطوات سويها بانتظام واظمن لك اسنان صحية وجميلة 

- اعتمدي على نظام غذائي لاسنان بيضا : كل شي يدخل جواك ينعكس على مظهر اسنانك يعني اذا انتي تشربين كميات هائلة من القهوا السودا او كنتي مدمنة شيشة توقعي ان ذا الشي راح يأثر تأثير واضح على اسنانك المعادلة جدا سهلة اي شي لونه غامق قبل تحطينه بفمك بالتأكيد راح يصبغ اسنانك , بالمقابل نظفي اسنانك بعد كل شغلة احتمال تصبغ اسنانك.

- مدة التنظيف : عشان تحصلين على افضل تنظيف من البكتيريا لازم تنظفين اسنانك على الاقل لمدة دقيقتين , تقدرين تحطين منبه عشان تعرفين الوقت بالضبط.

- امسكي فرشاتك كنك تمسكين قلم : اذا فرشاتك شكلها كنك غسلتي فيها سيارة ف الظاهر انك تنظفين اسنانك بقوة طبعا ذا الشي غلط لان تنظيفك لاسنانك بقوة ما راح يشيل البلاك والعكس صحيح , امسكي فرشاتك كنك ماسكة قلم عشان لا جيتي تنظفين اسنانك ما تفركينها بقوة , الطريقة الصحيحة انك تفرشين اسنانك بحركات دائرية افضل من انك تحركينها رايح جاي.

- اشربي كوب شاهي كل يوم : الشاهي يحتوي على مركبات الفلافونويد اللي تمنع البكتيريا الضارة انها تلزق باسنانك ويمنع من انتاج نوع من السكر اللي يساهم بتسوس الاسنان وبرضو يحتوي على كمية عالية من الفلوريد.

- غيري فرشاة اسنانك باستمرار كل شهرين عشان لا تنقلين البكتيريا لاسنانك.

- نظفي لسانك : باستخدام مكشطة اللسان كل صباح عشان تشلين البلاك والبكتيريا منها وتحافظين على نفس منعش لان السبب الرئيسي للرائحة الكريهة هي تراكم البكتيريا على اللسان.


ماراح اتعمق بالموضوع كثير لان البوست ذا موجه لفئة معينة وهم البنات اللي حاطين تقويم اسنان , طبعا تنظيفك لاسنانك بدون تقويم اسهل بكثير من تنظيفها مع تقويم وكثير مننا ما يعرفون شلون ينظفون اسنانهم ويحافظون على بياضها بفترة التقويم بسبب وجود اشياء تمنع وصول الفرشاة بشكل كافي لكل الاسنان وتنظيفها لكن ذا الشي ابد مو عذر انك تهملين اسنانك , اهمالك باسنانك في هذي الفترة بالذات راح تسبب لك مشاكل كثير بعد التقويم ويصير عالجتي مشكلة و جتك مشكلة جديدة وذا الشي مانبيه يصير.
اذا ودك باسنان بيضا وصحية بعد التقويم اهتمي  كل الاهتمام بادق التفاصيل باسنانك ونظفيها من قلب والا ترا بقايا الاطعمة راح تتجمع حول التقويم وتسبب لك انسلاخ بطبقة المينا.

عن نفسي صارلي سنتين مركبة تقويم باسناني , بالبداية جدا استصعبت الاهتمام كنت انظف اسناني كالعادة وما اهتم لادق التفاصيل لكن بعد المشاكل اللي تعرضت لها صاحبتي بعد التقويم قررت انني التفت لذا الشي واعطيه جزء كبير من روتيني الصباحي والمسائي لاني ابي اسنان جميلة وصحية بعد التقويم وكلنا نبي ذا الشي طبعا.

اذا كنتي بالعادة تاخذين نص ساعة بتنظيفك لاسنانك ف مع التقويم راح تاخذين ساعة بس حبة حبة راح تتعودين غير كذا كل شي يهون عشان مظهر جذاب وابتسامة فاتنة.


اشياء لازم تتوفر عندك  :


- فرشاة اسنان كهربائية 
- غسول فم " لسترين" يحتوي على فلورايد
- خيط  اسنان مشمع
- فرشاة التقويم proxabrush






خطوات العناية بالاسنان مع تقويم :


1) عملية تنظيف الاسنان راح تكون اطول زي ما ذكرت , يفضل انك تستخدمين فرشاة كهربائية اذا كنتي ما تستخدمينها قبل.
ليه؟
لان فرشاة الاسنان الكهربائية راح تكون اسهل مجرد انك تحطينها على اسنانك وهي تكمل الشغل عنك غير كذا تتحرك بسرعة كبيرة بعكس حركتنا بالفرشاة العادية.

2) ابدا ابدا ابدا لا تهملين الخيط صح الخطوة هذي صعبة شوي لكن مرة مهمة وكثير لما يحطون تقويم يهملونها وفي فئة ما يعرفون شلون يستخدمونها بوجود جسر الحديد على الاسنان وان شاء الله راح اشرح الموضوع لاحقا.
3) لا تستخدمين معجون مبيض لانه راح يبيض اسنانك وبعدما تشيلين التقويم تبقى البقع اللي عليها المربعات موب بيضا وهنا يصير منظر الاسنان غريب نوعا ما اهم شي تركزين ان المعجون اللي تستخدمينه يحتوي على كمية مناسبة من الفلورايد.
4) خلي فرشاة التقويم معك دايم خصوصا اذا كنتي برا عشان لا جيتي تاكلين شي تقدرين تنظفين التقويم من الاكل اللي لزق عليها.
5) استخدمي لسترين عشان يعطيك ريحة نفس منعش
















الطريقة الصحيحة لتنظيف الاسنان مع تقويم:

اذا كنتي لابسة الاشرطة المطاطية شيلهم قبل لا تبدين بالتنظيف.
1. بعد ما تحطين كمية المعجون المناسبة بالفرشاة حطيها على اسنانك بشكل زاوية منحرفة بحيث تكون ضد اللثة.
افرشي اسنانك بحركة دائرية وحاولي تفرشين كل سنة 10 ثواني مو اقل.
2.افرشي السلك . اضغطي على الفرشاة بشويش عشان شعيرات الفرشاة توصل للاسنان برضو, نظفي سطح اسنانك وتأكدي ان الفرشاة تحت السلك. الفرشاة الكهربائية تسهل لك العملية بكثير
3.افرشي سطح اسنانك الداخلي  بشكل دائري بشويش
4. الضروس افرشيهم بشكل عادي اللي هو لقدام ولورا ولا تنسين تنظفين لسانك طبعا.
5. مضمضي بالموية زي المعتاد وشيكي على اسنانك واسلاك التقويم 
6. مضمضي بغسول اسنان يحتوي على فلورايد لمدة دقيقة عشان يمنع التسوس وبقع الاسنان البيضاء




طريقة استخدام الخيط :


استخدمي خيط مشمع لان الخيط العادي احتمال انه ينقطع بسهولة.

1) دخلي الخيط بين سلك التقويم واسنانك بعد كذا دخليه بين اسنانك.
2) حركي الخيط بلطف روحة وجية بين سنين من اسنانك وكرري العملية على كل اسنانك.
3) حاولي توصلين الخيط لكل جزء ممكن تتراكم فيه البكتيريا بس انتبهي تسوين الخطوة هذي بعنف.


التقويم تعتبر مرحلة وراح تعدي ان شاء الله صحيح نستصعبها بالبداية لكن بالاخير لما نشوف النتيجة راح ننبسط كثير وننسى الم الشد والقروشة غير كذا خوذي لك صور قبل تشيلينه لان بكرة راح تشتاقين لشكلك بالتقويم.
اذا ماكنتي تعرفين شلون تهتمين هذا البوست بين يدك محد انولد يعرف كلنا نتعلم ونحسن من نفسنا ماحبيت ادخل بموضوع الاكلات الممنوعة لان اغلب اللي حاطين تقويم عندهم خلفية بالموضوع بس احيانا ما نهتم ونغش شوي.
نصيحة لا تقربين من المكسرات القوية ابددد , اكلتها مرة وندمت اشد الندم من الالم اللي جاني.
 تذكري ان الاسنان بهذي الفترة رقيقة اي شي ممكن يألمها ويضرها , برضو في حركة كثير يسوونها اللي هي انك تلعبين بالتقويم بلسانك , حنا شايفينه شي عادي بس لازم نبطل ذا الشي لانه يسبب تراكم المادة اللزجة  والبكتيريا على التقويم.
اهتمي ثم اهتمي ثم اهتمي

حرام تروح عليك هذي الفرصة وبكرة ولا كنك حطيتي تقويم بسبب تكاسل منك , الموضوع اسهل بكثير من توقعاتنا شوية وقت راح تحسن النتيجة بكثير خلونا انيقات في كل شي حتى بابتسامتنا.



♥ 



باقة لافندر لكم انيقاتي.

هناك 15 تعليقًا:

  1. موضوع مهم ازميل .. يعطيك العافيه

    ~ توافيق

    ردحذف
  2. جبتيها على الجرح ياكثرهم اللي ما ينظفون اسنانهم الا بالمناسبات
    وبعدين يجون يشتكون اسناني واسناني معليش اسنانك ماتنظف نفسها :/
    موضوعك بطل ويحتاجونه كثير مفيد وشهاني اقوم افرش هههه
    تسلم يدينك يا بطلتنا 3>

    ردحذف
  3. حبيبتي انتي مره شكراً ويعطيك العافية وجاري تجربة اشيائك بس اللي مستسصعبتو الخيط حاولت كذا مره بس ما عرفت له أبد بس بجرب الخيط المشمع إللي تقولي عنه مشكلتي وهاذا خطأ انو إذا جيت أفرش لازم اشوف الدم إذا شفتو حسيت إني فرشت اسناني بس ان شاء الله اعديها هالخطوه اررجع واقولك تسلمي على احلى بوست من احلى جميلة

    ردحذف
    الردود
    1. شكرا على التدوينه يعطيك العافية استفدنا!
      ريفيو مكياج

      حذف
  4. مشكوره مره الموضوع مهم وكثير يهملونه أنا عن نفسي مركبه تقويم وافرش اسناني وكذا
    بس تبقى صفرا ما ادري ليه المهم بتبع نصايحك وان شاء الله تعطي نتيجه

    ردحذف
  5. نصائح مفيدة
    كخطوة ثانيه بعد التقويم لازم تنظيف بالعيادة + ممكن جلسة تبييض لأني أحس التقويم يأثر على درجة لون الأسنان بشكل أو بالثاني مهما عملنا.
    بعدها ممكن الشخص يفكر بلصقات التبييض أو القوالب حسب ما يرتاح له

    يعطيك العافية و الشهر عليك مبارك /
    خبطة

    ردحذف
  6. حبيبتي مشكوره وجزاك الله خير

    ردحذف
  7. شككككراااااا على المعلوماات المفييدهه :"") ..
    بس كنت بدي اسأل الشاهي اللي من المفروض نشربو كل يوم
    بيكون شاهي اخضر لانو الاحمر على حسب معرفتي انو يبقع على الاسنان :/ !!

    و شكررا لك :)

    ردحذف
  8. أنا بنت عمري 12 راح احط تقويم لكن ابقى اعرف كم سعره بالاقساط؟؟

    ردحذف
  9. CV SUPERPALMA BRIQUETTE & FUEL INDUSTRY

    We are selling Briquette and Fuel in any sizes and shapes
    our speciality is making briquette for fuel industry, shisha hookah and barbeque


    We are producing our own charcoal, 100% charcoal with professional burning system to maintain the quality

    • Size 2.5 x 2.5 x 2.5 cm
    • Size 4.5 x 2.5 x 2.5 cm
    • Size 2.5 x 2.5 x 1.5 cm
    • 7000 Calories up
    • 2.5 Hours Burning Time
    • White Ash
    • Smokeless
    • Sparkless

    We able to customize in any sizes or shapes depends on demand

    We are looking for overseas and local buyers for coconut shell charcoal briquette, please contact us :

    Visit : briketsuperpalma.blogspot.co.id

    Contact us :

    cvsuperpalma@gmail.com

    +6281902245046

    +6289665045973

    Whatsapp & Kakao Talk : +6289665045973

    Blackberry Pin : 7D3AA790

    Cv. Superpalma Briquette
    Tegal, Jawa Tengah
    Indonesia

    ردحذف
  10. أزال أحد مشرفي المدونة هذا التعليق.

    ردحذف
  11. أزال أحد مشرفي المدونة هذا التعليق.

    ردحذف
  12. أزال أحد مشرفي المدونة هذا التعليق.

    ردحذف
  13. أزال أحد مشرفي المدونة هذا التعليق.

    ردحذف

تعليقك يسعدني يَ مزة ♥