صدرك اخر شي بلستة إهتماماتك (أشكال الصدر+ روتين متكامل للعناية بالصدر و شوية ماسكات)

السلام عليكم ورحمة الله وبركاته

♥ 

♥ 

بوست اليوم راح يكون مختلف عن باقي البوستات اذا كنتي ماتحبين المقدمات تقدرين تنزلين اما اذا لك في الطويلة اقري من البداية.
كلنا اعتنينا ببشرة وجهنا وايدنا ورجولنا بس اهملنا شي اعتقد انه من اهم الاجزاء اللي فينا كبنات ومظهر من مظاهر انوثتنا والشي اللي يميزنا عن الرجل الصدر.

اغلبنا اهتمامه الاول والاخير في الصدر منصب على الحجم يعني اللي صدرها صغير تدور طرق تكبر فيه صدرها والعكس صحيح.
ونسينا ان جمال الصدر موب بحجمه اهم شي يكون مشدود ومنظره جذاب.

طبعا في فرق شاسع بين اللي صدرها كبير ومترهل و واللي صدرها صغير ومشدود هنا الجاذبية تكون من صالح الصدر الصغير الموضوع مهوب بالاحجام بالمنظر عشان كذا لازم نعطي وقت نهتم فيه بصدرنا من جوا ومن برا.
قبل كل شي لازم تتعرفين على صدرك وهذي الحقائق راح تساعدك انك تعرفين طبيعة صدرك , شكله وحجمه.

حقائق عامة عن الصدر : 

- الصدر زي الجسم بالضبط يجي بمختلف الاحجام والاشكال , الصدر يتغير كل ما كبرتي بالعمر وشي طبيعي ان صدرك اليمين يختلف عن اليسار, الصح ان واحد ينمو اسرع واكبر من الثاني بما معناه ان الوضع هو نفسه بالنسبة لكل بنات حواء.

- مظهر صدرك تأثر فيه عوامل كثيرة زي الدورة الشهرية , الحمل , الرضاعة , التغذية و التقدم في العمر كل هذي العوامل ممكن تغير ملمس و مظهر صدرك.

- بعض البنات وقت الدورة تحس ان حجم صدرها صار اكبر من المعتاد وبرضو تحس بالم والسبب يرجع لإحتباس السوائل برضو مع مرور الوقت صدرك يترهل اكثر خصوصا اذا كنتي مرضعة بسبب تغير الهرمونات.

- الغدد اللي تشكل الثدي تسمى الغدد الثدييه وهذي الغدد هي اللي تنتج الحليب للرضاعة الطبيعية.

- مهم جدا تعرفين شكل وملمس صدرك الطبيعي اوقفي قدام المراية وشوفي شكل صدرك ذا الشي يساعدك تميزين اي تغيرات ممكن تطرأ عل شكله او ملمسه.

حطي ببالك ان حجم الصدر مايتغير بكريمات وبغيره من الخرابيط , الحجم ماراح يتغير الا بالعملية غير كذا اي احد يقولك ان فيه كريم او غيره ممكن يكبر صدرك دخلي من اذن وطلعي من الثانية , كمان لاحظت في المنتديات ان الاغلبية ينصحون صاحبات الصدر الصغير انهم ينامون على صدرهم عشان يكبر وذا الشي اكبر غلط ممكن تسويه اي وحدة فيكم, لان شكل الصدر راح يتشوه ويصير مخروطي نوعا ما عشان كذا لا تنامين على صدرك ابد انتبهي.
كثير يقولون بعد الزواج حجم الصدر ممكن يتغير لا تعتمدين على ذا الشي لان مافي دراسة تثبته, والموضوع يرجع لطبيعة جسمك اولا واخيرا.


أشكال الصدر وخصائص كل شكل :

شكل وحجم الثدي يتغير بشكل مستمر زي ماقلت وذا الشي يعتمد على نوعية الدعم اللي انعطى للصدر اثناء وبعد نموه وتطوره.
كل وحدة فينا لها شكل صدر مختلف عن غيرها وبما اننا مجتمع محافظ اغلبنا يجهل ذا الشي بسبب الخجل وثقافة العيب, يعني موب من الطبيعي انك تشوفين صدر غيرك لذلك مترسخ في بالنا ان للصدر شكل واحد لا غير وذا الشي موب صح , اشكال الصدر تنقسم لـ 8 اشكال منها 3 تعتبر تشوهات وهي رقم 6 ,7 و 8.

اسامي التصنيفات الـ 8 :

1) الثدي المثالي : الحلمة بارزة لبرع وموازية للارض , الصدر متناغم بشكل كويس ومرن , هذا النوع يعتبر نادر جدا وغالبا اللي يسوون عمليات تجميل ما يطلبون تكبيرو بس لكن يطلبون ذا الشكل والدليل ان كل اللي مسووين عمليات صدر اشكال صدورهم كذا

2) الثدي المترهل : الحلمة تشير لتحت والصدر بشكل عام متدلي للارض. زي مانعرف ان الجاذبية دايم تكون ضد اي شي يحاول يرتفع والصدر موب مستثنى من الموضوع , ترهل الصدر له اسباب متنوعة منها التقدم بالعمر وسن اليأس اما الترهل للبنات غالبا 
يكون بسبب ان الصدر ما لقى دعم كافي وقت التطور في سن البلوغ او الانسجة اللي تدعم الصدر تكون ضعيفة.

3) الثدي المنقض : الصدر هنا موب مترهل لكنه ينحني شوي لجوا فوق الحلمة وتكون الحلمة عمودية تقريبا على الارض.

4) الثدي الصغير : هذا النوع عنده انسجة دهنية قليلة مقارنة مع الباقي , غالبا الحلمة تكون صغيرة برضو ويكون فيه انقسام بين الثديين طبعا ذا النوع غير مرغوب فيه بالنسبة للبنات ولو انه له ايجابيات كثير ماراح اتطرق لها الحين.

5)الثدي الكبير : بعكس الصدر الصغير ذا الشكل فيه انسجة دهنية اوفر والحلمات دايما كبيرة وغالبا ما يسبب ذا الشكل الآم في الظهر والرقبة بسبب الثقل.

تشوهات الصدر الشائعة :

6) الثدي الانبوبي : ذا الصدر يكون شكله اسطواني اقرب مايكون شبيه بالباذنجان غالبا ما تكون الحلمة صغيرة واحيانا تكون بارزة بشكل ملفت بسبب تقلص انسجة الصدر , شكل الصدر ضيق يعني الثديين بعيددين عن بعض نوعا ما بسبب صغر القاعدة.

7) ثدي الحمامة: تعتبر اشد الصدور تشوه , شكل الصدر يكون منحني  , عظمة الصدر تكون بارزة لقدام شكل الصدر بشكل عام مايشبه صدر اساسا.

8) الثدي المحفور: عكس اللي فوقه هنا الصدر يكون محفور نوعا ما.

ايش اسوي عشان احافظ على صحة صدري ؟

اهم شي تمشين على نظام صحي يفيد جسمك كله منها راح يفيد صدرك برضو 

- كثري من اكل الفواكه والخضار يوميا منها البرتقال والشمندر لانه راح يحسن صحة جسمك على العموم.
- كثري من الاكلات القليلة الدسم والغنية بالالياف. 
- حافظي على الرياضة وذا الشي راح نتطرق له بالبوست ان شاء الله.
- حمالات الصدر تأكدي انها تناسبك وتريحك ولا تلبسينها وقت النوم بتاتا البتة.

روتين العناية ببشرة الصدر :

برنامج العناية ينقسم لأربع اقسام :

 - ترطيب: بشرة الصدر زيها زي اي بشرة تحتاج ترطيب مستمر عشان تحافظين على ملمس صدرك وتحمينها من الجفاف 
تقدرين تستخدمين نفس المرطب اللي تستخدمينه لجسمك.

- اقنعة تسوينها بنفسك:
زي ما تسوين اقنعة لبشرتك وش المانع انك تسوين قناع لصدرك وتهتمين فيه خصوصا الاقنعة الطبيعية مافي احسن من الطبيعة عشان كذا انا مدمنة ماسكات طبيعية.

قناع التفاح والحليب لشد الصدر :

المقادير :

نص كوب حليب 
تفاحة 

الطريقة :

قطعي التفاح لمربعات صغيرة وحطيه مع الحليب على النار لين يفوح الحليب
بعدها اخلطيه بالخلاط او اهرسيه لين يعطيك قوام ثقيل شوي 
حطيه على صدرك لمدة 15 دقيقة.

فوائد الماسك:
التفاح مصدر رئيسي لاغلب الفيتامينات منها فيتامين ج اللي يعتبر مضاد للاكسدة ومقاوم للترهل وبرضو يجدد خلايا البشرة , يحتوي التفاح على نسبة كبيرة من الموية عشان كذا ترطيبه عالي نوعا ما.
الحليب : يفتح لون البشرة , يشد البشرة بشكل ملحوظ و ينظف البشرة.

الماسك ككل يعتبر ماسك ممتاز يعزز جلدة الصدر ويشدها , المواد المضادة للاكسدة في التفاح تمنع ظهو التجاعيد وتقلل من حب الشباب.

رأيي :

انا استخدمته لمدة اسبوع حاليا عشان اقدر احكم بما ان الحكم من اول مرة راح يكون صعب.
حسيت ان القناع نعم ملمس صدري وعطاه منظر حيوي ومشرق اكثر غير كذا فتح لونه ومع الاستمرار راح يعطي نتائج افضل اكيد. 

قناع البيض وفيتامين E

المقادير :

بيضة 
4 كبسولات فيتامين E
ملعقتين زبادي

الطريقة:

اخلطي البيضة مع الزبادي بالخلاط كويس بعدما ينخلط افتحي الكبسولات على الخليط وامزجيهم سوا
حطيه على صدرك برضو لمدة 15 دقيقة تقدرين تلبسين حمالة صدر قديمة وتجلسين فيها 

ذا القناع يعتبر سهل جدا واي فئة عمرية تقدر تستخدمها غير كذا مافيها اي اثار جانبية لانها طبيعية اذا ما فادك ما يضرك تطمني.

رأيي :
حسيته فريش ولاني احب شي اسمه زبادي حبيته حسيت طرى ملمس صدري وصغر المسامات وراح احاول استمر عليه.

في بنات يعانون من نمو الشعر بين الصدر او الحلمات تقدرين تشيلينه بالحلاوة بحيث انك تاخذين قطعة صغيرة وتشيلين فيها الشعر او ك خيار بديل يمديك تستخدمين ملقط وتشيلين فيه.

- تمارين رياضية :

كثير ناس تعتقد ان الصدر والعضلات ما ترتبط ببعض وذا الاعتقاد غلط ليه ! لان عضلات صدرك هي اللي تدعم ثديك والشي اللي يمنع تدلي صدرك هي عضلة صدرك الخاصة فيك عشان كذا لازم تمرنين العضلة هذي لانها متى ما انشدت انشد الصدر معها بالعربي بتمرينك لعضلات الصدر اللي تدعم شكل صدرك  راح يبين صدرك مشدود وصحي.

 من التمارين اللي تساعدك انك تمرنين عضلات صدرك البوش اب.

التمرين الاول :

خوذي وضعية البوش اب وخلي اصابع يدك للداخل بحيث توجهينها نحو وسط جسمك 
خلي المسافة بين ايديك واسعة وارفعي رجلك لفوق.
انزلي بجسمك زي تمرين البوش اب بس لا تركزين على ذراعك مو مهم ينحني كله اهم شي حطي تركيزك على صدرك 
كلما وسعتي المسافة بين ذراعك وقربتي يدك لبعض كلما كانت النتيجة افضل.

التمرين الثاني:

تعتبر السباحة رياضة ممتازة لعضلات الصدر لانها تمرن جذعك كله ومن ذا المنطلق راح تساعد انسجة صدرك تبين افضل.
ومن فوائد السباحة انها تحسن تكييف الاوعية الدموية والقلب وتقوي عضلاتك وتزيد من القدرة على التحمل وبرضو يحسن المرونة عندك , بلس ان مقاومتك للموية يعتبر بحد ذاته تمرين.

التمرين الثالث :

اوقفي مقابل الجدار بمسافة قدم تقريبا , ابعدي رجلك عن بعض وخلي يدك على الجدار اعلى من مستوى الكتف , اثني كوعك كنك تسوين بوش اب بس وانتي واقفة.

- مساج للصدر:

شخصيا اعتقد ان اي نوع مساج جميل , ومتأكدة ان الاغلبية راح يوافقوني الرأي .يعتبر المساج جدا صحي و واحد من افضل العلاجات لجسمك , المساج راح يحفز الدورة الدموية بجسمك عامة وصدرك خاصة ذا الشي راح يساعد صدرك انه ينمو بشكل طبيعي وجميل, يرفعه و يشكله . من فوائد المساج برضو انه يخليك تسترخين غير كذا يعيد المرونة لجلدة صدرك وعضلته.
يفضل انك تسوين مساج لصدرك اقلها 3 مرات بالاسبوع لان بكذا راح تحفزين افراز الهرمونات والافضل انك تسوين المساج وانتي حاطة الماسكات اللي ذكرتها قبل فوق بكذا راح يعطي نتائج ممتازة للاثنين بنفس الوقت لكت تذكري مع الاستمرار.


خطوات المساج بالترتيب :

- حركة الرفع والتشكيل:
حطي يدك اليسار على حلمة صدرك اليمين , بيدك اليمين حركي اصابعك من الحلمة لبرا بحركة خارجية سويها خمس مرات وبنفس الطريقة على صدرك اليسار.

- حركة دائرية :
حطي اصابع يدك اليمنى على صدرك اليمين , انتقلي بحركة دائرية حول صدرك كله سويها خمس مرات وكملي بالصدر اليسار.

- حركة دحرجة الصدر:
حوطي صدرك بيدك بحيث تكون يدك اليمين فوق ويدك اليسار تحت , دحرجي صدرك روحة وجية كأنك تدحرجين كورة سويها خمس مرات وكرري الحركة على صدرك اليسار.

- حركة الضخ :

باستخدام يدك اليمين و وراها يدك اليسار دلكي صدرك اليمين بحركة صعود سويها 10 مرات وبرضو نفسها على صدرك اليمين.

ملاحظة : الصور توضح الخطوات تماما اذا كان شرحي موب وافي.

نجي لاهم خطوة الكل تكلم فيها والكل كتب عنه ومع ذلك كثير لازالو يغلطون نفس الغلطة اللي هو الإختيار الصح للبرا , عن نفسي اتضايق من لبس البرا طول الوقت لان وظيفته رفع الثدي وانا صدري متوسط نوعا ما لذلك ما احتاج البس حمالات طول الوقت غير كذا احس بضيق بصدري لا لبسته يعني يادوب اتحمله وقت الضرورة. عموما الحمالات ما يفضل انك تلبسينها لفترات طويلة لانها راح تضيق على الصدر وتحبس السموم.

اضافة للحكي اعلاه قبل كم يوم قريت دراسة فرنسية تثبت ان لبس الحمالات ما يمنع الترهل زي ما الكل يعتقد لان مافي شي راح يمنع الجاذبية مهما قاومتيها برفع صدرك , لذلك الخبراء ينصحون بلبس الحمالات فقط لحالات الترهل الشديدة لكن ما يمنع انك تكونين معتدلة بحيث انك تلبسينه لفترات معينة.

عشان تختارين الحمالة الصح حطي ببالك ان في اشياء اساسية لازم تعرفينها عشان تساعدك  في اختيار الحمالة اللي تناسب صدرك منها :

- الباند يكون بالوسط لا نازل ولا مرتفع مرة
- الحبل لازم ما يكون ضيق بحيث انه يعلم على جسمك ويبين اثاره.
- لازم تعرفين قياس صدرك وشكله عشان تقدرين تختارين صح.
- عشان تعرفين اذا الحمالات تناسبك او لا دخلي اصبعين زي الصورة , اذا دخلت بسلاسة ف اختيارك صحيح.

على العموم راح اتكلم عن ذا الموضوع بالتفصيل الممل وبالصور التوضيحية ببوست ثاني , ادري ان البوست كان من العيار الثقيل ودسم نوعا ما بس كل المعلومات اللي ذكرتها راح تفيدك سواء لصحة صدرك او مظهرك.

♥ 

♥ 

باقة اوركيد لكل وحدة اسعدتني بطلتها هنا.