لمحة على : تقنية العلاج بالسوجوك " فن العيش بسلام " اسرار ومبادئ

ي الله حيهم

♥

♥

للامانة الجو الممطر يلهمني مافي اروق واجمل منه عشان كذا قررت اجلس بالحديقة وانزل لكم بوست جديد

مخلوط برائحة الارض بعد المطر وصوت زخاته.

رجعنا لتكي قسمي المفضل بعيدا عن المكياج والعناية خلونا ناخذ بريك شوي ونتعرف على اشياء جديدة

ونكتشف مجالات ثانية عشان ما نحكر انفسنا بمجال واحد فقط بالعكس التوسع مطلوب وممتع ويزيد من ثقافتنا

ويطور من شخصياتنا , الموضوع اللي راح اتكلم عنه اليوم لفت انتباهي جدا واحتمال انه مر عليكم خمسة بالمية

عشان كذا حبيت اتكلم عنه.

حنا ك بشر دائما نهمل انفسنا ونهمل صحتنا لين تتراكم علينا الامراض ثم نهرول للاطباء والمستشفيات بالوقت اللي

نقدر فيه اننا نهتم بانفسنا ونعالج ذواتنا بطرق اقل ما يقال عنها انها بسيطة.

كل اللي نحتاجه اننا نتعلم كيفية الشفاء الذاتي من خلال جزء معين من جسمنا وبكذا نقدر نعيش بسلام وبصحة وعافية باذن الله.

قد سمعتي بالعلاج عبر السوجوك ؟!

يمكن اول مرة تمر عليك الكلمة هذي طيب وش معناها او بصيغة ثانية وش هو السوجوك؟

سو يعني اليد جوك يعني الرجل

السوجوك علم حديث ونوع من انواع الطب البديل اكتشفه بروفيسور كوري بارك جي ويعتبر العلاج الاسرع والاوفر في العالم , يعتبر السوجوك تكنيك يسكن اي نوع وجع في جسمك والحلو فيه انه سهل وتقدرين من خلال تعلمه انك تطبقينه على نفسك بمنتهى السهولة وما ياخذ اكثر من ساعة.

تعتبر طريقة العلاج بالسوجوك من اشهر الطرق المعتمدة بين ملايين البشر وفي كل العالم خصوصا الدول المتطورة هذا ان دل على شيء دل على ان هذي الطريقة فعالة جدا للقضاء على معظم الالم اللي تواجهنا خلال يومنا المرهق والشاق.

جسم الانسان يعتبر عالم متكامل ومتناغم فمن نعم الله علينا ان ايادينا وارجلنا تحتوي على منظومة عمل متكاملة نقدر نشبهها بازرار التحكم عن بعد بحيث انها تتحكم بصحة الانسان , سبحان الله هذي الازرار تعتبر عيادة طبية طبيعية والعجيب بالموضوع ان هذي الطريقة ما تساعد في الشفاء وبس بالعكس من الممكن برضو انها تحميك من الامراض والالام هذي و زي مانعرف الوقاية خير من علاج.

اليد والقدم نسخة مصغرة عن باقي الجسم وهذا الشي هدية إلاهية من ربنا حبيبنا اعطانا اياها عشان نستفيد منها ونعالج انفسنا بانفسنا ف ليه ما نتعلمها ونستغل هذا الشي اللي فينا!

♥

♥

♥

♥

وش اللي يميز السوجوك عن غيره ؟

الشي اللي يميز العلاج عبر السوجوك انه مايعتبر اسلوب علاج بس , بالعكس هدف بارك جي كان اننا ندرك ونفهم قوانين الحياة البشرية وسعى انه ينشر روح التعاون بين البشر بهدف اننا نعرف معنى الحب وقيمة الصحة , غير كذا يعتبر ذا العلاج سهل وفعال وذا الشي يخليك ويخلي اي احد يقدر يعالج نفسه وغيره بدون ادوية .

على فكرة ذا الاسلوب محد اخترعه مجرد اكتشاف لاشياء ربنا عطانا اياها باجسامنا وحنا ماندري زي كثير اشياء ربي اعطانا وماندري عنها.

خلونا نتصالح مع انفسنا ونستفيد من التشابه بين ايدينا وارجلنا وجسدنا ككل ونحاول نعالج انفسنا ونحصنها ضد الامراض والذ مافي هذي الطريقة انها ماتضر على المدى الطويل بعكس الادوية الكيميائية.

" و في انفسكم أفلا تتفكرون "

زي ما قلت ان ربنا خلق بأيدينا وارجلنا منظومة شبكة عصبية تؤثر بشكل ملحوظ على باقي اعضاء جسمنا , هذي الشبكة عبارة عن نقاط منتشرة في اليد والقدم وكل نقطة موصولة بعضو محدد في الجسم من ادمغتنا الى المسالك البولية سبحانك ربي , هذي النقاط اول ما نحفزها ينعكس هذا التحفيز بشكل ايجابي على اعضائنا.

خلونا ناخذ المشي ك مثال المشي يعتبر من اهم الرياضات ليه ؟

لان المشي يحفز نقاط الشبكة العصبية اللي في اقدامنا بكذا ينعكس هذا التحفيز على اجسامنا وصحة اعضاءنا عشان كذا دايم تسمعون ان المشي يحافظ على صحة الجسم ويحمينا من اكثر الامراض

لذلك لابد اننا نتعلم شلون نحفز هذي النقاط اللي تعتبر منظومة الشبكة العصبية اللي تمثل اجسامنا وصحة اعضاءنا.

♥

♥

كيف ابحث عن النقطة الصح واحفزها؟

اولا لابد انك تحددين مكان الالم بالضبط , هل الالم في القسم الامامي من الجسم والا  الخلفي ؟ هل هو في الراس , في القفص الصدري , منطقة البطن او اليدين والرجلين ؟

بعدما تعرفين وين الالم بالضبط مابقى الا انك تحددين النقطة في يدك اللي تأثر على العضو المريض واضغطي عليها بقوة باداة موب حادة زي عود كبريت او قلم 

الضغط ذا راح يفتت الموجات الكهرومغناطيسية اللي تصدرها اجسامنا نتيجة

 لتعرضه لخلل ما.

ثانيا حركي العود بشكل دائري مع عقارب الساعة او عكسها , زيدي الضغط بالاداة تدريجيا راح تلاحظين ان النقطة المؤثرة راح توجعك اذا ضغطتي عليها لانها تأثرر وتتأثر برضو بالعضو المريض لذلك اذا ماعرفتي تحددين النقطة دوري على النقطة اللي توجعك اكثر شي وراح تكون هي النقطة الصحيحة.

 راح تلاحظين بمدة قصيرة ان الالم اختفى وتلاشى تماما هينا نكون خلصنا العلاج.

وانتي تبحثين عن النقطة اذا لقيتي اكثر من نقطة تألمك عالجي كل نقطة على حدى بنفس الطريقة اما بالامراض المزمنة فالتدليك مرة وحدة مايكفي لازم تكررين العملية يوميا من 3 الى 5 دقائق كل 4 ساعات.

حطي ببالك كلما حددتي النقطة وحفزتيها بالطريقة الصحيحة كلما كانت النتائج احسن واسرع.

الصور توضح النقاط اللي تماثل الالآم اللي ممكن تصيب عضو معين :

التدليك الوقائي لليد والقدم:

في العلاج بالسوجوك يعتبر التدليك مفتاح رئيسي للكشف عن نقاط مؤلمة في ايدينا او اقدامنا ما كنا ندري انها موجودة اساسا , عشان كذا خصصي لنفسك كل يوم وقت محدد تدلكين فيها ظاهر يدك وقدمك بابهامك وسبابتك وانا متاكدة انك راح تمرين على نقاط مؤلمة كثيرة تدل على مشاكل وعدم انتظام باجسامنا , كل اللي علينا نسويه اننا نحفز هذي النقاط زي ماتعلمنا , على فكرة منطقة الدماغ تتماثل مع نهايات الاصابع لذلك لابد ندلك نهايات اصابعنا وسطح اظافرنا وراح تحسين وانتي تسوين هذي الحركة بدفئ وراحة واسترخاء فضيع.

العلاج ببذور النباتات:

مبدئ اخر من مبادئ العلاج بالسوجوك انك تستخدمين بذور نباتات بغض النظر عن نوع البذرة.

ليه استخدام البذور وش السر فيها ؟

البذور هي من تربة الارض يعني عناصر التربة الغذائية موجودة في هذي البذور ودورها انها تحفز النقاط هذي لمدة طويلة بكذا راح نظمن ان الموجات الكهرومغناطيسية انزالت تماما من النقاط المحفزة.

 بنفس الطريقة اللي ذكرتها اعلاه اول شي واهم شي انك تحددين النقطة المماثلة للعضو المريض على يدك  واتبعي نفس الخطوات فوق وبعد  كذا جيبي البذرة وشريط لاصق , حطي البذرة على الشريط ثم حطيها على النقطة اللي قد حددتيها سابقا وركزي ضروريي  انك تغطين المنطقة الكاملة اللي تأثر على العضو المريض ودلكيها من وقت لاخر.

تشابه البذور والعضو اللي نبي نأثر عليه:

في الطبيعة توجد  بذور نباتات كثيرة تشبه اشكال الاعضاء باجسامنا وهذا من حكمة ربي , من الضروري انك تختارين بذور تشبه العضو اللي ودك تعالجينه لانه يلعب دور مهم في عملية الوقاية والشفاء مثلا اذا عندك مشكلة بالكلية وودك تعالجينها لابد انك تستخدمين حبات الفاصوليا لانها تشبهها بشكل ملحوظ وكلنا لاحظنا ذا الشي او الجوز للدماغ سبحان الله الجوز مرة يشابه الدماغ بالشكل وفي اكثر التفاصيل.

 هذي عدة امثلة لبذور تستخدم لعلاج اكثر الامراض شيوعا:

 بذور الرمان تستعمل لامراض السمع والبصر

الارز لنوبات الربو والسعال

بذور الكتان للامساك ووجع الاسنان

بذور القطيطة او الاذريون لالتهابات العين

حبوب البازيلا لفقر الدم وحصر البول

حبوب الذرة لارتفاع ضغط الدم والصرع

بذور الفلفل الاسود لمشاكل الانف والاذن والعين والصدر وا اوجاع الظهر والركبة

بذور القمح الروسي  لاوجاع العادة الشهرية و بزر التفاح لمشاكل الرئتين والقلب

بذور الورود البرية لمشاكل الكبد والمرارة

بذور التفاح لمشاكل المصران الغليظ

ملاحظة : تقدرين تستغنين عن البذور وتمشين على التدليك الاعتيادي باداة التحفيز لكن البذور راح تعطيك نتائج افضل واسرع.

ما اخفي عليكم انني بالبداية استغربت هذا الاسلوب للعلاج لكن الله قادر على كل شيء وصدقوني التماثل اللي بين ايدنا واجسامنا من المستحيل يكون هباءا منثورا , ربي ما يخلق شيء بدون سبب سبحانه وسبب هذا التشابه اننا نتعلم شلون نحافظ على اجسامنا اللي هي امانة ربي لنا , ماخلق ربي داء الا له دواء وهذا العلم القيم من الادوية اللى رزقها ربي لنا لكن قليل من يتفكر بنعم ربي, قبل اكتب الموضوع قريت عن التكنيك ذا وشفت تجارب لناس كانت عندهم مشاكل وبالفعل بفضل ربي وفضل العلم هذا شافاهم ربي.

مرة تعجبت من النتائج المبهرة واصريت انني اطبق التقنية هذي على نفسي عشان اتاكد من الموضوع.

♥

♥

جربت الاسلوب هذا على نفسي والتجربة خير برهان , كان هدفي انني اتخلص من الصداع بدون بندول او اي مسكن اخر ,  حددت النقاط اللي تمثل جانب راسي اللي موجود على جوانب الابهام لان الصداع كان متمركز على الجوانب بعد كذا جبت عود كبريت وضغطت وبعد فترة اختفى الالم تماما وقتها تأكدت تماما ان تجارب الناس ما كانت مبالغة نهائيا بالعكس اجزمت اننا ذبحنا انفسنا بالادوية والمسكنات من غير سنع اللي ممكن كثرتها تأثر علينا مدري ليه ماقد فكرنا ندور عن بديل يغنينا عنها ويخلينا نعيش بسلام مع انفسنا واجسامنا!

♥

♥

هدفي من ذا الموضوع اننا نبدأ نوسع مداركنا ونتعرف على اساليب يعتمدونها اشهر المعالجين حول العالم ونبطل بلع ادوية بدون حاجة ملحة لها , ماراح تخسرين اذا جربتي العلاج بالسوجوك قبل ما تاخذين الادوية صدقيني ماراح تعرفين قيمة النعمة هذي الا اذا جربتيها وانا اضمن لك انك راح تتمنين انك عرفتيها من زمان وقتها اذا مافادتك الطريقة هذي ابلعي ادوية زي ماتبين لكن ماراح تخسرين اذا جربتي بالعكس قال تعالى "وما اوتيتم من العلم الا قليلا".

يارب انني قدرت اوصل المعلومة بطريقة مبسطة ومفهومة واضفت لكم معلومات جديدة.

بستان من القرنفل لكم فاتناتي♥