محاكاة: جلسة بدكير و مينكير بجودة الصوالين + غسول لتوحيد لون اليدين ~ إسرقي من الزمن لحظة ~

مرحبا بأنيقاتي

انقطعت فترة بسيطة عن المدونة لكن رجعت لكم ببوست ثقيل كالعادة ويمكن اثقل
من المعتاد عشان اكون صادقة معكم.
هذا البوست صراحة كان ودي انزله مع العيد بس الظروف ما سمحت لان زي ماراح تشوفون يبي له رواقة وشغل عدل و وقت وهذي الاشياء كنت افتقر لها اخر فترة 
خصوصا اننا انشغلنا مع رمضان والعيد وكذا .
لكن بفضل الله قرر الموضوع يشوف الضو بعدما كان حبيس براسي .


مين فيكم ماتحب تروح الصالون وتكافىء نفسها بجلسة منيكير وبديكير جميلة 
استكنان و دلع , اتوقع مافي وحدة ماتخق عند ذا الشي خصوصا ان جلسات الصالونات تكون بروفشنال واخر شياكة.

لكن كثير سمعنا بالمشاكل اللي تصير للبنات من هذي الصالونات وقلة النظافة والجودة اللي مش ولا بد طبعا ما اعمم بس بعالمنا العربي الاغلب خدماتهم مش حالك.
فالأفضل دائما انك تسوين ذا الشي لنفسك بأغراضك الخاصة وبأجواء استكنانية ولا افخم.

الزبد الموضوع يمكن يكون أطول موضوع مر عليك لكنه غني جدا بالمعلومات اللي راح تفيدك وبجدول عناية متكامل من طأطأ للسلام عليكم 
فأحب انوه اذا ما عندك استعداد تقرينه كله أو ماتحبين الكلام الكثير الموضوع ماراح يناسبك اما اذا انتي تهتمين لأدق التفاصيل كملي.


























انا انسانة جدا احب مواضيع السبا وطقوس التدليل اللي فيها , اعتقد اغلبكم لاحظ ذا الشي من بوستاتي لكن افضل دائما انني بدل ما اصرف مبالغ كبيرة
على يوم واحد ازين كل شي بنفسي لنفسي او لغيري بذوقي ولمساتي الخاصة وطقوس احب ابتكرها واتكتك عليها بمزاج.

بوست اليوم راح يكون محاكاة لجلسات البديكير والمنيكير اللي يسوونها الصالونات بجودة عاليه واحترافية والاهم بسهولة لكن بوقت موب قصير
 طبعا الشغل اللي على السريع ما احبذه الا لأوقات الزنقة اللي مالقى
 فيها وقت احك شعر راسيعشان كذا دام حنا فاضيين
 ولسة باقي وقت على الدوامات والانشغالات يفضل اننا نخصص لأنفسنا وقت وسط زحمة الحياة نرتاح فيها ونجدد مزاجنا.

على البلاطة الروتين ذا يبي له روقان و6 ساعات على أقل تقدير لنفسك , مافيه جهد بتاتا بالعكس لكن المراحل طويلة وتبي لها تكتكة وطولة بال والاهم انك تكونين تحبين نفسك بالدرجة الأولى وتحبين الاشياء هذي عشان وانتي تسوينها تستمتعين وتشتاقين تعيدينها من وقت لأخر.




اليد تعتبر من اهم الاجزاء في جسمنا , نستخدمها كل يوم ولعدة اشياء عشان كذا لابد نخصص لها وقت عناية واهتمام خاص وتدليل
الرجل كذلك ماتقل اهمية ابدا عن اليد بالعكس , في مقولة قديمة تقول :

 “In life, you need a good bed and a good pair of shoes.”

ليه ؟؟!! 

لأنك اذا ماكنتي في الأول راح تكونين في الثاني اتفق مع المقولة هذي تماما,

 فكري فيها , اقدامنا هي اساسنا , نقضي يومنا وحنا نوقف , نمشي , نجري والخ

 يمكن ماتكون واضحة لنا زيي ايدنا لكن يوجد فيها اكثر من 7000 نهايات عصبية وتمثل جزء مهم في جسمنا

 في الحقيقة والواقع تعتبر اقدامنا خريطة لصحة اجسامنا وعقولنا لكن اغلبنا ما يأخذها بعين الاعتبار ومهملها خصوصا الناس الكسلانة بحجة ان محد يشوف الاقدام لذلك مو لازم نخصص لها روتين

بالعكس زي ما جسمك يهمك وبشرة وجهك تهمك ويدينك تهمك لازم برضو تضيفين اقدامك لقائمة اهتماماتك لانه اهمالك ممكن ينعكس على صحتك

حطي ببالك ان كل شبر بجسمك مهم تلتفتين له وتهتمين فيه عشان تصيرين انثى حقيقية متكاملة.

Manicures & Pedicures

المنيكير هو علاج تجميلي لليدين والأظافر من ظمنه التشكيل والتلميع وإزالة الجلد الميت.
بداية النساء مع المناكير كانت قبل 5000 سنة في الهند وكانو يستخدمون الحنا في المناكير اما أصل الكلمة فهي لاتينيه مشتقة من كلمة manus ومعناها يد و cura ومعناها اهتمام.

البديكير علاج تجميلي ايضا لتحسين مظهر القدمين والأظافر يعني هو اساسا منيكير بس لللقدم , البديكير جدا مفيد لانه يمنع أمراض الأظافر وفطريات الاقدام , تاريخ البديكير يرجع لمصر القديمة تقريبا اكثر من 4000 سنة وبرضو اصل الكلمة لاتينية.

مراحل جلسة المنيكير والبديكير :

- التغطيس
- التقشير
- قناع مغذي + قناع مرطب
- الترطيب الكثيف
- التدليك والاسترخاء
- تلميع وتشكيل الاظافر

التغطيس:

سواء لليد والرجل هذي المرحلة مهمة كبداية لانها تساعد على تليين المنطقة وبالتالي لما تجين تقشرين تصير العملية سهلة وتقضي على الالآم بعد يوم متعب وشاق.
غير كذا تعتبر طريقة مثالية للاسترخاء وتدليل يديك ورجلك خصوصا اذا حطيتي زيوت عطرية او ورود بالمغطس.

مغطسنا راح يتكون من ترطيب واستكنان وفخامة وفوق ذا في منتهى السهولة
طبعا تقدرين تستخدمين اي طريقة او مكونات انتي تحبينها وتناسبك لكن بشكل عام هذي طريقتي.

استخدمي موية دافية مايلة للحرارة وحطي بالمغطس ورود وزيوت عطرية لانها راح ترطب رجلك وبنفس الوقت تحسن مزاجك تقدرين تضيفين للموية لسترين + خل (انا استخدمت ميني باث بومب سويته بنفسي).
غطسي يدك لمدة 10 دقايق وسوي واحد لرجلك برضو بنفس الطريقة ونفس المدة.

التقشير :

بما اني احب اسوي الاشياء بنفسي حبيت اسوي مقشر خاص بيدي ورجلي تقدرين تعتمدينه او تستخدمين جاهز ماتفرق بس احب الاشياء اللي اسويها تبسطني وتدخلني جو ذا المقشر من بنات افكاري وسميته إيريس EREES حفظا لحقوق الملكية الفكرية ههههه لاش مهوب احسن مني عاد. 

مقشر EREES عبارة عن :

- ملح ملعقين كبار
- 10 حبات لوز مبشور
- ربع ملعقة صغيرة قهوة
- بشر ليمون
- ملعقة صغيرة عصير ليمون
-2 ملاعق زيت نباتي
- ملعقتين صغار بيكربونات الصوديوم
- ملعقة كبيرة زيت اللوز المر

نخلطهم سوا ونحطهم بمرطبان.

ريحة السكراب انتعاش وترطيبه لاهو كثيف ولا خفيف لاننا راح نرطب كويس بمرحلة الترطيب عشان كذا استبدلت زيت الزيتون بالزيت النباتي لانه خفيف نوعا ما اما زيت اللوز المر فهو ممتاز للتبيض وتمتصه البشرة بسهولة.

حطي شوي من المقشر على اليد/الرجل وافركي بشكل دائري وبخفة لمدة خمس دقايق خليك حنينة عشان لا تخدشين نفسك , اغسلي يدك/رجلك بموية شبه باردة وجففيها بالطبطبة.
بعد كذا نظفي الاظافر وتحتها بالفرشاة المخصصة.


Manicures & Pedicures drill 

هذا الجهاز عبارة عن مقشر كهربائي يقشر الجلد الميت لباطن الرجل واليد وبرضو عنده رؤوس لبرد الاظافر وتلميعها, النوع اللي عندي جاني هدية وحبيت فكرة اني اعتمدته لروتيني لكن ما حبيته كثير خصوصا ان من خلال بحثي شفت انواع افضل وبروفشنل بشكل اكبر لذلك افكر اجيب غيره لكنه حاليا يفك ازمة .


الراس المدبب اللي على اليسار وظيفته يقشر الجلد الميت اللي تكون بكعب الرجل وجدا جدا جدا جميل يدخل بالعمق ويقشر طبقات ما تقدرين تقشرينها بالحجر العادي عشان كذا حبيته , حتى تشققات الكعب يشيلها وتصير رجلك انعم من رجل الاطفال.

الراس الحاد بالوسط وظيفته يبرد الأظافر مخصص لأظافر الرجل لانها صعبة تبردينها بالمبرد العادي غير كذا يختصر الوقت وممتاز.

فرشاة التنظيف هذي الفرشاة بعد البرد او التقشير تمررينها على المنطقة وتشيل منك الجلد المتقشر.

الرأس المسطح على اليسار وظيفته يملس سطح الظفر سواء الرجل او اليد.

الرأس اللي بعده ينعم جلد القدم بعد التقشير.

الرأس اللي على اليمين وظيفته تلميع الظفر زي مكعب التلميع.

تقدرين  تستخدمين حجر التقشير ك بديل , عن نفسي غالبا استخدم الحجر او ماكينة التقشير
 استخدم الراس المدببة وامررها على الكعب وباطن الابهام لمدة من 5 الى 10 دقايق.

قناع  أحماض الفواكه:

من فوايد ذا القناع انه يحارب التجاعيد في اليد ويرطبه ويحتوي على نسبة عالية من مضادات الأكسدة غير كذا يفتح لون البشرة ويعطيها رونق ونظارة يعني مناسب جدا للبنات اللي يشتكون من تجاعيد اليد.
 اما احماض الفواكه فهي ممتازة لتقشير الجلد الميت 

 ماسك الفواكه عبارة عن :

- خوخ 

- عنب اخضر 

- زبادي 

- موية ورد 

- قطرات من زيت الجوجوبا

الخوخ : يحتوي على نسبة عالية من فيتامين اي وسي , يساعد بتنشيط وترطيب البشرة , غني بأحماض الفواكه , يحتوي على مادة النكتارين التي تساعد في تقشير البشرة والتخلص من الجلد الميت ويوحد لون البشرة.

العنب : يحتوي على السكريات والفيتامينات واحماض الفواكه اللي تنعم الجلد وتقشره غير كذا تشد الجلد.

زيت الجوجوبا : يشد البشرة ويرطبها.

الطريقة:

اهرسي الخوخ والعنب بدون القشر واخلطيهم مع باقي المكونات لين يصير عندك خليط.
حطي الخليط جوا القفازات الشفافة ثم البسيها لمدة ربع ساعة بعد كذا اغسلي يدك بموية فاترة وجففيها.

راح تلاحظين النعومة من اول استخدام استمري عليه وشوفي النتايج الجميلة.

ملاحظة : الرجل تقدرين تكتفين بقناع  شمع البرافين لان وضع الفواكه على الرجل حرام عشان كذا قناع الفواكه مخصص لليد فقط.

قناع شمع البرافين للترطيب:

وش هو شمع البارافين؟

عبارة عن زيوت معدنية خام تم تكريرها وفصل الشمع من هذي الزيوت بعد كذا يتم تنقيتها من خلال الغلي والتبريد وثم الضغط عبر فلت روبكذا ينتج عندنا زيت ثقيل او مثل ماهو معروف شمع البرافين.

 يتألف البرافين من سلسة الهيدروكربونات المستقيمة الصلبة اللي تختلف في درجة الانصهار من حوالي 48-66 درجة مئوية.
تم اختبار البرافين في المختبرات والنتيجة كانت انها امنة صحيا للإستخدام.
 شمع البارافين ماله لا طعم ولا رائحة , ويعتبر ثقيل للغاية في التركيب الجزيئي لذلك يزيد من تدفق الدم الى المنطقة اللي نستخدمه عليه ويوصل الرطوبة للطبقات السفلية من الجلد مما يؤدي الى تجدد شباب الجلد ويغذيها.

اثبتت الدراسات ان استخدام شمع البارافين لليد والرجل يساعد على خفض الالام والالتهابات والتشنجات العضلية غير كذا يعتبر مهدئ ويرطب الرجل واليد بكثافة ويقضي على التجاعيد بنسبة كبيرة.


تاريخ البارافين:

يرجع استخدام العلاج بالبرافين الى الامبراطورية الرومانية , كانو الرومانيين يذوبون الشمع ويصبونه على الجسم عشان يحضرون الشخص للمساج والعلاج ,
 بعد كذا جو الفرنسيين واستخدمو شمع البرافين المصهور على الجروح لتسريع الشفاء اما في الحرب العالمية الاولى استخدم البريطانين الشمع البرافين كبروتوكول لعلاج اضطرابات العظام في المستشفيات العسكرية.

في العصر الحديث صار العلاج بالبرافين شائع ويستخدم على نطاق واسع لعلاج الحالات التالية:

- التهاب المفاصل
-الاكزيما
- الالتهابات
- التشنجات العضلية
- الصدفية
- تصلب المفاصل
- الخ

قناع البارافين لليد والارجل يزينونه بعض الصالونات لكن باسعارغالية يعني اذا سويتيه مرة يمكن مايكون عندك امكانية تستمرين فيه.
طبعا لنتائج افضل لابد من الاستمرار, لذلك مافي شي يمنع انك تسوينه لنفسك بتكلفة اقل وبدون قروشة الصالونات ووجع راسهم وبنظافة.
 تقدرين تستخدمين البارافين لركبك وكوعك برضو لانه يرطب ويبيض مع الوقت
 احب استخدمه بالشتا لان ايدي وأقدامي تكون جافة بالمرة وبكذا ارطبهم واحميهم من الجفاف غير كذا دفئه مريح بالشتا تحسين بانتعاش.

كل اللي تحتاجينه :

- شمع بارافين (تلقينه بالنت انا جبته من صالون)
- زيت اللافندر العطري
- زيت الزيتون
- قلفز البارفين / شرابات البارفين
- كيس نايلون
- صابونة صلبة

الخطوات :

- ذوبي شمع البارافين في حمام مائي وحركيه لين يذوب ويصير سائل.

- ادهني طبق بشوية زيت زيتون وصبي عليه الشمع.

- حطي على البارافين قطرات من زيت اللافندر اللي يساعدك على الاسترخاء.

(انا الشمع حقي مضاف له زبدة الشيا وريحته كانت جميلة 

بدون زيت اللافندر لكن اضفت قطرة لاني احب ريحته)

- غسلي يدك/رجلك بالصابونة انتبهي موب سائلة لان الغرض هينا التنظيف والتجفيف وبكذا تقدرين تستخدمين الشمع اكثر من مرة.

- جففي يدك/رجلك بالطبطة وادهني شوية زيت زيتون.

- اذا تكونت قشرة علوية على البارافين يعني ان الحرارة مناسبة اغمري يدك/رجلك بالبرافين وطلعيها ثم ارجعي اغمريها وطلعيها 4 مرات لين يتكون عندك طبقة كثيفة من الشمع على يدك. 

- لفي يدك/رجلك بكيس النايلون ثم البسي القلفز واجلسي باسترخاء لمدة نص ساعة.

- قشري الشمع وحطيه بمكان جاف لاستخدامه في اي وقت.

ملاحظة : تأكدي من حرارة البارافين قبل تغمسين يدك عشان لا تتسببين بحروق لنفسك دخلي طرف اصبعك البنصر وشوفي اذا كانت تناسبك الحرارة او لا.

الترطيب الكثيف:

هذي اهم خطوة , الترطيب راح يكون اكثف من العادة عشان كذا يحبذ تعتمدين مرطب ثقيل نوعا ما عشان يحافظ على ترطيب البرافين اللي سويناه, اختيارك لمرطباتك راجعة لك طبعا اختاري اللي يريحك وتحبينه.

مرطباتي المفضلة كالتالي:

1) LEMONY FLUTTER مرطب الليمون من لاش:

 مرطب اتعب وانا اقول جمممميل , ريحته انتعاش ويرطب بشكل عميق ولانه يحتوي على الليمون فبالاستمرار يبيض لانه ثقيل نوعا ما احب استخدمه قبل النوم عشان تمتصه يدي براحتها , المرطب ذا مخصص اساسا للكيوتيكيل بس ذا ما يمنع انك تستخدمينه لليد كلها واحيانا استخدمه لركبي واكواعي ترطيب وتوحيد لون.



2) HEMB HAND/FOOT PROTECTOR مرطب ذا بودي شوب :

من الاكثر مبيعا ترطيبه كويس بس مهوب ثقيل زي ما انوصف لي , يحتوي على زيت بذور القنب اللي هو نوع من انواع الحشيش عشان كذا ريحته يمكن تضايق شوي لانه اشبه بريحة الأرض والزرع وكذا بس انا مافرقت عندي ماضايقتني مرة احب ترطيبه واستخدمه طول الوقت مبين من شكله هههه وبرضو استخدم نفس الكريم بس للرجل , اذا ودي ترطيب خفيف لرجلي اعتمده لانه خفيف نوعا ما ولطيف.

3) مرطب الشيا سويته بنفسي :

عبارة عن زبدة الشيا + زيت اللوز + زيت الجوجوبا + زبدة الافوكادو.
مرة جميل ثقيل وبنفس الوقت تمتصه البشرة بسهولة وما يروح من اليد الا اذا غسلتها بالصابون عموما ذا المرطب متعدد الاستخدامات استخدمه لوجهي ورجلي ورقبتي ويدي وجسمي بإختصار عشق.

( على فكرة العلبة علبة ماسك للوجه مالقيت غيرها وحطيت الكريم فيها )

في هذي الخطوة اعتمدت اثقل مرطب عندي اللي هو مرطب الشيا , دهنته بيدي وخمس دقايق امتصتها البشرة بعدين دهنت رجلي ولبست شرابات , لازم بعد الترطيب تلبسين شرابات فيما لا يقل عن 4 ساعات عشان يحافظ على الرطوبة.

التدليك والإسترخاء:

Shiatsu Hand and Foot Massage مساج شياتسو لليدين والرجلين:

 مساج الشياتسو او المعروف ايضا بالعلاج بالإبر عبارة عن  تقنية الضغط بالاصابع واحيانا يتم خلطه مع الوخز بالإبر لكن طبعا ماراح نستخدم الابر هينا.

معنى كلمة شياتسو بالياباني ضغط الاصابع , يعتبر نوع من الطب البديل ويتألف من الضغط بالاصابع , الإطالة والفرك وتقنيات المساج الاعتيادية.

فوائد مساج الشياتسو :

- استرخاء عميق للانسجة والعضلات

- الحد من التوتر

- زيادة المرونة

- تحسين دورة الدم

- يقلل من ضغط الدم 

- يهدئ الاعصاب ويعطي شعور رائع 

ذا المساج سهل وبسيط وتقدرين تسوينه لنفسك عشان كذا اخترته لكن برضو فيه انواع معقدة اكثر راح اتكلم عنها بوقت ثاني.

الطريقة :

1) اضغطي على باطن يدك/رجلك من الرسغ لكل الاصابع روحة وجية.

2) اعصري كل أصبع على حدا واسحبي بلطف.

3) اضغطي على المفصل اللي بين ابهامك وسبابتك واسحبي لبرا كرري العملية 3 مرات.

4) دفي اصابع يدك/رجلك لورا.

 برد , تشكيل وتلميع الأظافر:

هذي المرحلة الكل يعتمدها طبعا ومافي احد مايعرفها يمكن هذي اكثر مرحلة نحبها من المناكير خصوصا النيل ديزاين والفنتكة.

اشياء تحتاجينها:

- مبرد ومكعب التلميع من ذا بودي شوب
- اعواد البرتقال للكيوتيكيل
- زيت الكيوتيكيل
- مناكير

اظافر اليد ابرديها بالمبرد العادي بأي شكل يتناسب مع يدك , بعد كذا ملسي سطح الظفر نفسه ثم لمعيه بالمكعب.
حطي زيت الكيوتيكيل على الكيوتيكيل ثم دفيه لجوا بأستخدام الاعواد انتبهي بشويش.
اخر خطوة اللي هي المناكير اعتمدي الديزاين اللي يعجبك وبالالوان اللي تحبينها.

( انا لرجلي استخدم الآلة و ابرد فيها اظافر رجلي

بعد كذا املس سطح الظفر بالراس المملس واخر خطوة المعه براس التلميع.

و زي اظافر اليد أكرر خطوة الكيوتيكيل للرجل برضو

والمناكير طبعا هي اللمسة الجمالية الأخيرة والديزاينات )

غسول احماض الفواكه لتوحيد لون اليدين :


كثير بنات يعانون من اسوداد المفاصل وعدم توحد لون اليد , السبب الأول والأخير يرجع للجفاف خذيها قاعدة

تقشير + ترطيب = توحيد لون 

يعني كل ما قشرتي ورطبتي يدك باستمرار كل ما صارت يدك بلون واحد وخالية من المشاكل.
السبب يرجع برضو لكثرة غسيل اليد بالموية والصابون لان ذا الشي يزيل المادة الحمضية الطبيعية اللي تحمي الجلد من التصبغات وغيرها من المشاكل.

لذلك  بإستعمالك لذا الغسول بعد كل غسلة باستمرار راح تحافظين على هذا الحامض و راح تلاحظين تووحد لون يدك بشكل ملحوظ 

الغسول مكون من :

- 8 ملاعق كبيرة موية ورد
- 3 ملاعق كبيرة جلسرين
- 3 ملاعق كبيرة كحول 
- ملعقة كبيرة عصير ليمون
- ملعقة كبيرة عصير برتقال
- ملعقة كبيرة خل التفاح

تخلطينهم سوا وتحطينه بقارورة وكل ما غسلتي يدك ارجعي اغسليها بذا الغسول ثم رطبيها زي ما اتفقنا.


للاسف اغلب حالات اسوداد مفاصل اليد ترجع للوراثة وفي هذي الحالة صعب انك تعالجين المشكلة لانها بالجينات.

 مهما حاولتي تبيضيين ماراح تبيض عشان كذا لا تخلين ذا الشي اس ترتكزين عليه او انك تخلين المشكلة هذي تؤرقك وتتعب نفسيتك.
تقبلي ذا الشي وتعايشي معه وصدقيني باهتمامك بيدك راح تبين اجمل يد بعكس اذا اجتك وحدة يدها بيضا ومو مهتمة خير شر.
خلي نعومة يدك وجمالها تطغى على هذي المشكلة بحيث انها تخلي الناس تنتبه للمنظر الانيق وتطنش العيوب الصغيرة هذي واهم نقطة خلك ذكية واختاري الوان مانيكيير ما تبين الاسوداد وتلفت الانتباه لها اكثر.


حضَوركم الراقِي هٌنا يفَوح شَذاه بِالارجَاء أنيقاتي لكم هذه

دمتم بود