عندك زواج ؟ قوليلي وش شكل جسمك واعطيك فستانك #DIET & WORKOUT

♥

♥

السلام عليكم ورحمة الله

موسم الحفلات بدا وبدت الحوسة معه , اكثر موقف يوتر انك تختارين الفستان اللي يبرزاناقتك من ناحية الموديل واللون وستايلك بشكل عام , لكن اغلبيتنا ما يهتم لنقطة مهمة في اختيار الفستان بغض النظر عن موديله.
كم مرة اخترنا فساتين جميلة لكن اول ما نلبسها تتغير نظرتنا للفستان ونسحب عليه.
العيب مهوب بالفستان ولا هو بجسمنا المشكلة اننا ما اخترنا الفستان اللي يناسب شكل وتضاريس جسمنا.
عشان كذا هذي السلسلة راح تساعدك تختارين فستان حفلتك بحيث يناسب ملامح جسمك ويكون مرجع لك في الازمات.


كل وحده فينا عندها شكل جسم معين يختلف عن الثانية وزي ما كلنا نعرف الاشكال الرئيسيه للجسم هي:

- الساعه الرملية
- المستطيل
- الكمثرة
- التفاح
- المثلث المقلوب

اكيد في بنات يحسون انهم ماينتمون لاي من المجموعات هذي, يمكن صدرك يكون كبير او صغير و خصرك بارز او لا.

نقدر نقول ان ملامح جسمك ممكن يشوه تصورك لمظهر جسمك , يعني مثلا اذا انتي سمينه مرة/نحيفة مرة ماراح تقدرين تحددين من الشكل لأي فئة انتي تنتمين.

طيب وش نقصد" بشكل الجسم"؟

نقصد ان ملامح شخصية جسمك تعتمد على محيط الخصر عندك . بكل بساطة كيف تناسق (الجزء العلوي , الوسط و الجزء السفلي) وتناسبهم مع بعض.

كيف تحددين شكل جسمك؟

اولا انتبهي للاماكن اللي تحسينها تكبر اول مايزيد وزنك لان هذي الخطوة راح تسهل عليك تحديد شكل جسمك.

الطريقة الاولى :

- اوقفي مسافة بعيدة شوي قدام المرايه ولازم تكون بالطول وتوريك جسمك بالكامل: ( يحبذ تسوينها بالملابس الداخلية لان الملابس العادية رح تخفي الشكل الاصلي).
- ركزي على جزءك العلوي و ملامح جسمك من انحف جزء في خصرك الى قفصك الصدري  ولا تنسين شكل اردافك.
 كلهم رح يحددون شكل جسمك عموما .
- حددي اصغر مكان في جسمك و بالمقابل الاكبر (اكتافكك, صدرك , خصرك و اردافك ) برضو حددي التعرجات والاماكن المستقيمة في جسمك.
- حددي عيوب جسمك مثلا اردافك كبيرة او اكتافك عريضة.
- طبعا عندك مزايا لاتنسينهم.

 الطريقة الثانية ممكن تفيدك اذا مابان لك الشكل بالطريقة الاولى او اذا حابة تتأكدين

خذي  شريط قياس وقيسي محيط صدرك , خصرك واردافك  وسجليهم في الرابط هنا  .

طيب راح ابدا بشكل جسم يعتبر معقد نوعا ما ويبي له كذا خطوة عشان يعطيك الطلة السمبتيك اللي تحلمين فيها.

صفات جسم التفاحه : 

- الصدر مليان
- الاكتاف والخصر عريضين يعني ما عندها خصر محدد
- الذراع والرجل والارداف نحيفة

مشكلة هذا النوع من الجسم انه يجمع الدهون في منطقة الوسط اللي هو عبارة عن الخصر (اكبر منطقة) واللي ممكن الناس تشوفها كرشة . عادةً ما يكون ذا الشكل اكبر من فوق واصغر من تحت .
الدهون الموجودة في هذي المنطقة تحيط بالاجهزة الحيوية , صحيح انك تقدرين تتخلصين من هذي الدهون لكن اذا اهملتيها ممكن تعرض صحتك لأمراض مثل :

- السكري (النوع الثاني)
- امراض القلب
- زيادة  انتاج هرمون التوتر عندك
لكن حطي ببالك ان هذي الدهون سهلة تتخلصين منها بالنسبة للدهون الثانية.

نظام الحمية :

حاولي كثر ماتقدرين تخففين من الكاربوهيدرات مثل المكرونة والخبز الابيض لانها تحتوي على نسبة كبيرة من السكر اللي يزيد من توترك وجوعك , زي ما اتفقنا نبي نتخلص من الدهون المتجمعة بالوسط.

النظام الرياضي :

عشان تتخلصين من الوزن الزايد في هذي المنطقة لازم تتبعين تمارين متقطعة بحيث انك تبدين تمارين مكثفة اولا  بعدين تقللين ثم ترجعين تكثفين وكذا.

اسهل شي انك تركبين الدرج وتنزلين بسرعة لمدة بين دقيقتين الى 5 دقايق وبعدين تاخذين راحة لمدة ثلاثين ثانية وترجعين تركبين وتنزلين 5 دقايق لين تحسين انك بذلتي مجهود , بهذي الطريقة راح تحرقين دهون بطنك ومنطقة خصرك.

كيف تختارين فستان السهرة اللي يناسبك 

احرصي انك :

- تلفتين الانتباه لمنطقة الصدر بحيث انك تخلين قصة الفستان  V نك ( القصة اللي تكون على شكلV)  او سكوب نك (القصة الدائرية النازلة.
- ابرزي خصرك بأنك تضيقين الفستان من تحت الصدر او تحطين حزام كذا راح ترفعين الخصر وتخبين منطقة البطن.
- اذا بتلبسين فستان قصير لازم يكون على مستوى الركبة او فوق الركبة ابدا ابدا مو تحته واذا طويل لازم يكون من تحت واسع ومن فوق ضيق.

Tips:

- بغض النظر عن شكل جسمك وعيوبه حبي نفسك زي ما انتي وحاولي تركزين على مزايا جسمك لانك اذا حبيتي نفسك اللي حولك راح يحبونك.
- شكل جسمك مو شرط يبقى زي ماهو احتمال يتغير مع الوقت بسبب الحمل او غيره.
- بعض الاجسام مالها شكل محدد يعني ممكن تاخذ صفات من عدة اشكال لكن اهم شي انك تعرفين شلون تبرزين الايجابيات.

بعض الموديلات اللي تقدرين تعتمدينها :

♥

♥

♥

♥