لا اشياء ثم اما بعد: الطفش ما عاد يلزمنا اجندة للصيف #INSPIRATION

   السعادة هي عندما تفكر , عندما تقول وعندما تنسجم مع نفسك ♥ 

♥ 

♥

السلام عليكم ورحمة الله

كثير مجهزين خطط للصيف ذا والاغلبية ناوية تسافر وتنبسط وتغير جو الكتمة والحر اللي بالسعودية
طبعا الهدف الاول راح يكون دولة جوها بطل وجميل زي اوروبا واذا لا اقرب محطة تركيا لكن اذا انتي مالك حظ وطلعتي منتي مع الشعب اللي مجهزين تذاكرهم اكيد انك الحين متضايقة وماغير طفشانة وتتحلطمين على الرايح والجاي.
مشكلتنا الفراغ ذابحنا , من قوته نضيع اوقاتنا بتفاهات نندم عليها بعدين , تدرين ان الوقت اللي عندك ذا بكرة راح تتمنين انه يرجع ! الفراغ زي ماهو نعمة فهو برضو نقمة عشان كذا حرام نضيع علينا شهرين اجازة نقدر نتعلم فيها اشياء ما كنا نعرفها ونكتشف فينا حاجات جديدة يمكن تكون سبب في تغييرنا للافضل.
طيب هل فكرتي بدل ماتجلسين طفشانة تزينين لك جدول مليان بالفلة والوناسة بعيدا كل البعد عن الطفش وما الى ذلك ؟

اذا انك فكرتي وجهزتي جدولك وناوية تنفذين اقولك برافو عليك اللي زيك قليل.
اما اذا لا تعالي خليني اساعدك بشوية افكار واقولك عن جدولي يمكن يعجبك ويعطيك دافع انك تزينين زيه لكن بالشكل اللي يناسبك وباهتماماتك , بكذا تكونين استغليتي صيفك بأكمل وجه وطلعتي منه وحدة جديدة ومليانة حياة.


دلعي نفسك :

نفسك ثم نفسك ثم نفسك وتحتها ستين خط , اكيد قبل الاجازة مرينا بفترة ضغوطات الدراسة والاختبارات ويمكن ما اعطينا نفسنا الاهتمام اللي نستحقه سواء نفسيا او حتى جسديا.
اكتبي الاشياء اللي لما تجين تسوينها تبسطك بورقة حتى لو كانت طويلة ماعليك قدامنا الصيف كله مثلا انتي انسانة تحبين جمعات البنات خصصي لنفسك يوم مع صاحباتك واجتمعو بحيث ان الجمعة ما تكون اعتيادية لازم تسوين شي جديد او اذا عندك اخوات كثير زيي استغلي ذا الشي وسوي سهرة بناتية. تقدرون تسوون عناية جماعية قسمو الاشياء على بعض مثلا وحدة مسؤولة عن عناية الوجه , الثانية عن البديكر والمنيكير والثالثة عن عناية الشعر كذا  تكونون انبسطتو وبنفس الوقت اهتميتو بحالكم.

من الافكار االلي تخليك تدلعين نفسك :

عبي بانيو الحمام موية دافية , شغلي شموع وحطي لك بابلز او ورد احمر بالبانيو خليه يوم استرخاء واستكنان
اهتمي بنفسك ,سوي السنفرة السويدية مثلا او اي نوع انتي تحبينه , حطي ماسكات بوجهك وشعرك برضو
بخري غرفتك بريحة تحبينها وتجيبب لك الروقان.


غيري ستايلك :

زي ماتعرفين التغيير من برا راح يغير اللي جوا ويأثر على نفسيتك , اعتمدي لوك جديد ويحبذ يكون مختلف تماما عن ستايلك القديم
وش فيها لو جربتي تغيرين لون شعرك من اسود لبني فاتح ! او ممكن تغيرين  قصته او حتى تسوين تان بما انه دارج, بس تأكدي انك تختارين شي يناسبك ويناسب شخصيتك والاهم انك ترتاحين بستايلك الجديد , لا يهمك رأي احد فيك خليك انتي وسوي اللي يعجبك.
تقدرين تغيرين الاشياء اللي حولك , ابدي بغرفتك مو شرط تغيرين الاثاث كله لا بس حطي لمساتك فيها من شغلك , غيري ترتيبها عشان تحسين ان في شي حولك تغير عن الروتين اللي متعودة عليه.

طوري من نفسك :

كل وحدة فينا عندها هواية اهملتها بوقت الدراسة والشغل وما الى ذلك اعتقد صار الوقت انك تلتفتين لهواياتك اللي ركنتيها بالرف
مارسي هوايتك كبداية عشان تعتادين عليها بعدين حبة حبة  طوريها , فلنفترض انك تحبين الفوتوشوب والتصميم تعلمي تصممين على برنامج ثاني زي الاليستور او غيره , لا تحاولين  ماعندك عذر الله ما اكثر الدروس اللي على النت ضغطة زر وكل الدروس قدامك

تعلمي تطبخين اذا ما كنتي تعرفين , مافي احلى من انك تدللين نفسك بشوية حلى واكل مشتهيته بدل المطاعم.
اذا تعرفين تطبخين تعلمي تكنيك الطبخ , او مثلا شوفي لك طبخة عمرك ما توقعتي انك تسوينها وسويها صدقيني راح تحسين بالفخر والانجاز بعد كذا.
اقري الكتب اللي صارلك فترة مكودتها على طاولتك وبعدما تخلصين قراية حللي الكتاب واكتبي التحليل عندك كذا راح توسعين نطاق معرفتك طبعا الاهم انك تقرين بشتا المجالات عشان تصير الفايدة اشمل.
تعرفين تحطين مكياج ؟ مين مايعرف !  لكن وش رايك تتعمقين بالمووضوع ,المكياج مجال واسع وما يقتصر على بلش وكحلة وروج لا كل شي له اتيكيت بالمكياج اذا تعلمتي الاتيكيت راح تصيرين بيرفكت مع الوقت وموب بعيد تصيرين محترفة  انتي بس انوي ونفذي.
قوي  لغتك الانجليزية مثلا او تعلمي لغة جديدة مو صعبة صدقيني الحمد لله النت مسهل علينا اشياء كثيرة.


العبي :

اي العبي وش فيها اللعب بالعكس شي جميل وتغيير روتين , اذا عندك اخوان صغار العبي معهم احكي لهم قصص مافي اجمل من انك تقضين يومك مع الاطفال اشياء ربانية جميلة يمتصون كل طاقة سلبية فيك ويعطونك طاقة ايجابية هائلة.
اجتمعي مع اهلك سوو اشياء سوا انبسطو سواا , من الاشياء اللي متعودين عليها ببيتنا كل نهاية اسبوع نسوي مسابقة لكل اللي بالبيت بحيث اننا نكون قروبين واخوي يجهز اسئلة دينية وثقافية ونجلس بالصالة ونلعب , مرة ننبسط بذا اليوم والضحك والدموع ما تخلص وفوق ذا كل يوم نكتسب معلومة جديدة جربيها راح تتغير حياتك 180 درجة اظمن لك ذا الشي.


اهتمي بنفسك :

كبداية ابعدي كل البعد عن الجنك فود والا اقولك قاطعيها BIG NO NO ,بذا الشهرين اعتمدي نظام صحي واكل صحي  ,خصصي لك يوم من الاسبوع تسوين فيه detox diet عشان ينظف جسمك من السموم , الموية اهم نقطة  كثري منها بالحيل تقدرين تنزلين اب على ايبادك او ايفونك يذكرك كل شوي عشان ما يكون لك عذر, الرياضة لو تمشين نص ساعة بس لا تهملين ذا الشي, فوايد الرياضة لا تحصى ولا تعد سواء على صحتك او جمالك وحتى مزاجك.
لا تنسين تهتمين بالجانب الروحاني, على كثر قربك من ربك على كثر ما تصير نفسيتك اهددا واروق , كم مرة ودنا نحفظ الاذكار اقل شي, بس من انشغالتنا ما نحفظ و نأجل اعتقد صار وقته الحين.
كل يوم احفظي لك صفحة من القرأن , صومي ثلاثاء وخميس , تصدقي او سوي خدمة لوجه الله للمساكين اللي طاقتهم الشمس , ساعدي امك فرحيها اقضي وقتك معها دلعيها هي اكثر وحدة بالعالم تستاهل وقتك واهتمامك ودعوة منها راح تفتح لك ابواب ما ظنيتي انها راح تنفتح لك.



هذي خطوات بسيطة كلنا نقدر نسويها لا تقولين مالي مزاج او ما اقدر كلنا نقدر اسهل من كذا مافي.
حفزي نفسك وامدحيها اذا حسيتي انك حققتي هدف من اهدافك ذا الصيف لا تبخلين على نفسك ابد كافأيها حسسيها انك تحبينها.
دايم امدحي نفسك وتوقعي من نفسك الكثير , اشحني عقلك بالافكار الايجابية خلي هدفك قدامك.
و قولي انا قدها انا اقدر , برضو تقدرين تدورين تحفيزات من اشياء ثانية
مثلا انا هدفي بأذن الله اصير جراحة فكل ما حسيت ان معنوياتي هبطت لو نقطة افتح على مسلسل نبض الحياة واحس انني جد اتحفز يمكن طريقتي عبيطة شوي بس جد احس بفرق بعدما اشوفه , احس اني انشحن من جديد واصر انني اكمل بحلمي.

يارب انني قدرت افيدكم لو شوي وان شاء الله حابة اسوي سلسلة # صيف_إزميل  بحيث اننا نطبق على النقاط اللي فوق سوا مع بعض نتعلم كل اسبوع شي جديد سواء طبخة , صنعة , نشوف فلم او نقرا كتاب اذا حابين الفكرة راح اكمل عشان في بنات كثير تتحفز اذا كانت مع مجموعة فذا الشي راح يساعدها.

باقة اوركيد لكل فاتنة مرت من هنا. ♥ 

كوني كما انتي.

                                                     ♥ 
                                            ♥